Read lulogooli Zaburi 40 Bible Online

Zaburi 40 - lulogooli bible

Zaburi 40

¹Nda lindirira Yahova nobwikudziri; Naye ya huliridza, na hulira lyanira lyange.

²Ya ntwulidza mbogo bwokuti hidza, kandi mu buterere bwo budohi; Na ya nsingeridza virenge vyange ku lwanda, na a luviridza ligenda lyange.

³Kandi ya vika mmunwa gwange ulwimbu luhya, nalwo lu veye Iidzominya lya Nyasaye wetu: Avanyinga va la lola, na va la tia, Na va la suuvira Yahova.

⁴A veye nobugasu mundu u kolanga Yahova kuva kisuuviri kikye, Na a vula kuyeka ku avegingiri kinga kuvo ava kyama ku ububehi.

⁵O Yahova Nyasaye wange, miyinzi gyokugenya gya u koli gyi veye minyingi, Na tsiganagani tsitsyo itsi veye ku kwinye: Si tsi nyala kuvalidzwa ku ive; Ni mba ni nyenya kutsigamba no kutsivola, Tsi veye tsinyingi kuduka tsi ta nyala kuvalidzwa.

⁶Visyuviriru na vihaanwa si u yanzidzwa navyo; Amatu gange u giguye Vihaanwa vyokusambwa na vihaanwa vyobwoni si u vyenya.

⁷Kunangwa nda vola, Yo, nzidza; Mu lilingwa lya kitabu ng'odeywimu:

⁸Inze nyanza kukola ubulaliri bubwo, O Nyasaye wange; Yee, amalago gogo ga veye mu mwoyo gwange.

⁹Nzilwadzi ubulungi mu livugana linene; Henza, si nda gaya minwa gyange, O Yahova, ive u manya.

¹⁰Ubulungi bubwo si mbisi mu mwoyo gwange; Ubusuuvirifu bubwo na ubuhonyi bubwo mboye; Tsimbabasi tsyobuyanzi tsitsyo na agaligali gogo si mbisi ku livugana linene.

¹¹O Yahova, u ta gaya tsimbabasi tsitsyo ku inze; Tsimbabasi tsyobuyanzi tsitsyo na ageligali gogo vi ninda kazozo.

¹²Kigira vidamano vi ta nyala kuvalidzwa vi nkumbiridzi; Ubukyamu bwange bu ng'umiye ndi, si nyala kuhenza igulu Vi medeka kuvita lisu lyoku mutwe gwange; Kandi mwoyo gwange gu ndeki.

¹³O Yahova, mwadza, u mbonnye: O Yahova, u kole bwangu kunkonya.

¹⁴Va vikwe mu tsisoni, na va leganywe halala; Avenyanga mwoyo gwange kugudividza: Na viranywe inyima, na va legwe Ava sangala ku lidambidzwa lyange.

¹⁵Liverera li va gwire kuva madanyi getsisoni tsyavo Yavo ava mbolera, Aha, aha.

¹⁶Vosi avenyanga ive, va sangale na va tsantsalike mu ive: Yavo vosi ava yanza ubuhonnyi bubwo va hongere kuvola, Yahova a kuminywe.

¹⁷Navutswa inze mbeye mudaka na welyegomba; Navutswa Mwami a ng'anagananga: Ive u veye muhonnyi wange na mbohololi wange; U ta lidagira, O Nyasaye wange. Lwomunene Wehinyimbu.