Read lulogooli Zaburi 45 Bible Online

Zaburi 45 - lulogooli bible

Zaburi 45

¹Mwoyo gwange gwizuye amakuva malahi; Mbola vindu vya nombeye mwami: Lulimi lwange lu veye ikalamu yomung'odi mugulu.

²Ive u veye mulahi kuvita avana va avandu; Tsimbabasi tsi tsukeywi mu minwa gyigyo: Kigira yaga Nyasaye u ku gasidzi ubugasu bwemihiga nemihiga.

³Webohe kivavi kikyo ku kikenge kikyo, O ive wetsingulu, Na ubukumi bubwo na ubunene bubwo.

⁴Na mu bunene bubwo u gende nobugasu, Kigira ageligali na ubuhoma na ubulungi: Na mukono mulungi gugwo gu la ku mannya vindu vyokutihidza.

⁵Mibano gyigyo gyi veye miyugi; Avetsihiri va gwidza isi wowo; Gyi veye mu mwoyo gwavasigu vomwami.

⁶Intebe yoyo yobwami, O Nyasaye, i hindiraga mihiga nemihiga: Impimbo yobulungi i veye impimbo yobwami bubwo.

⁷Ive u yanzi ubulungi, nokudunyira ubudamano: Kigira yaga, Nyasaye, Nyasaye wowo, u ku vaki Maguta gobuyanzi kuvita avakye vovo.

⁸Tsingubo tsitsyo tsyosi tsi funya mwayu gwa manemane, na uudi, na kida; Mutsinyumba tsya amino getsinzogu, ubukana bwa ku yanzidza.

⁹Avakana va avami va veye halala na avakali vovo avidzomi nywa: Ha mukono mulungi gugwo, mwami wekikali u singiye, wiviki ithahabu ya Ofiru.

¹⁰Hulira, ive mukana, u lole, u tegidze ugutu gugwo; Na wivirire avandu vovo mwene, na avenyumba ya dada wowo:

¹¹Ku yaga mwami a lenya ubulahi bubwo; Kigira a veye mwami wowo; na ive u mu sigamire.

¹²Kandi mukana wa Turo, a la ra yo nekihaanwa; Avatugi mu avandu va lenya tsi mbabasi tsitsyo.

¹³Mukana womwami a veye nobu kumi ligali mu inyumba yobwami: Tsingubo tsitsye tsi lombeywi nethahabu.

¹⁴A la letwa ku mwami netsingubo tsyobubahbale: Avakana avagima avakye veve ava mu londanga Va la letwa ku ive.

¹⁵Va la letwa nobuyanzi na ubusangali: Va lingira mu inyumba yomwami.

¹⁶Mu bugono bwa vaguga vovo, va la va ho avana vovo, Ava u la kola avanene mu lirova lyosi.

¹⁷Nda kola lieta lilyo lidzulitswe mu makula gosi: Kunangwa avandu va la ku santidza mihiga nemihiga.