Read lulogooli Zaburi 5 Bible Online

Zaburi 5 - lulogooli bible

Zaburi 5

¹U hulire makuva gange, O Yahova. Na u mannye aga nganagananga mmwoyo.

²U hulire mwoyo gwe lilira lyange, Mwami wange, na Nyasaye wange; Kigira nsaalanga ku ive.

³O Yahova, mugamba u la hulira mwoyo gwange; Mugamba nda lungikidza lisaala lyange ku ive, na nda linda.

⁴Kigira si u veye Nyasaye wokuyanzidzwa nobudamano: Na ubwoni si bu la menya na ive.

⁵Aviidzominya avene si va la singira imbiri wowo: U dunyiranga vosi ava kolanga ubwoni.

⁶U dividza ava volanga ububehi: Yahova a vihirirangwa mundu wekisahi, nowobugadi.

⁷Navutswa inze, nda ingira mu inyumba yoyo mu bunyingi bwetsimbabasi tsitsyo: Mu litia ive, nda sigamira mu liyeka ku litempeli lilyo lita katifu.

⁸O Yahova, u nzimirire mu bu lungi bubwo, kigira avasigu vange: U lungikidze inzira yoyo imbiri wange.

⁹Kigira si ha veye nelibugirira mminwa gyavo; Muvo buveye ubudamano bunene; Amadundu gavo ga veye kilindwa kyalamu Tsinimi tsyavo tsi veye tsindoto.

¹⁰U lang'aminye ubwoni bwavo O Nyasaye U leke va gwe ku tsimbembatsyavo; U va te kyova ku bunyingi bwobutingu bwavo; Kigira va koli ubwebaali ku ive.

¹¹Navutswa vosi ava suuviranga ku ive va sangale Va kupe lwanga lwobuyanzi kazozo; kigira u va kinganga: Kandi yava ava yanza lieta lilyo va sangale mu ive.

¹²Kigira ive u la gasidza avalungi; O Yahova, u la va kumbiridza netsimbabasi, kuli nengavo.