Read lulogooli Zaburi 50 Bible Online

Zaburi 50 - lulogooli bible

Zaburi 50

¹Nyasaye, Wanyala Vyosi, kah Yahova, u voye, Nokulanga lirova kutwula ku litonga lyeliuva nokuduka ku liyera lyalyo.

²Kutwula Zioni, ubudukiru bwobulahi Nyasaye u ng'ereng'ani.

³Nyasaye wetu yadzanga, na si a kiring'ana mba: Muliru gu sambanga imbiri wewe Na ku tsimbega tsitsye ki la va kuli kihi kinene.

⁴A la langa ligulu lyegulu Kandi a langa lirova, a duke kukalagira avandu veve:

⁵Mu vungidze halala avatakatitu vange ku inze, Yavo ava lagana ninze ku kihaanwa.

⁶Kandi amaguiu gilwadza ubulungi bwibwe; Kigira Nyasaye mwene a veye mukalagi. [Selaha

⁷Avandu vange, mu hulire, na nda vola; O Israeli, na nda ku lolekidzira: Mbeye Nyasaye, kali Nyasaye wowo.

⁸Si nda ku gondokira ku vihaanwa vivyo; Na vihaanwa vivvo vyokusambwa vi veye imbiri wange kazozo.

⁹Si nda vugula igiriki yomu inyumba yoyo, Kinga tsikole tsyomu kego kikyo.

¹⁰Kigira tsinyama tsyosi tsyomulitu tsi veye tsyange, Kandi imitugu gyi veye ku vigulu elfu.

¹¹Mmanya amanyonyi gosi gevigulu; Kandi tsinyama tsyombulimu tsi veye tsyange.

¹²Ni mba ni mbeye nenzala, si nda ku volera; Kigira lirova; Ni lyange, na vyosi vizula mu.

¹³Inze nda lia inyama yetsigiriki, Kinga nwe masahi getsimbuli?

¹⁴Haana ku Nyasaye kihaanwa kyelisantidza; Nokutunga ga u lagi ku U Veye Igulu Ku Vyosi

¹⁵Na wanire inze ku lidiku lyekivi: Nda ku honnya, na ive u la nkuminya.

¹⁶Navutswa Nyasaye a tevanga mudamano, U veye naki u duke kuvola malago gange Nokuvugula lilagana lyange mu munwa gugwo,

¹⁷Kigira u veye mundu u sulanga kwegidzwa, Na u teye makuva gange ha mgongo gugwo?

¹⁸Lwa wa lola mwivi wa hambana naye, Na kidieli kikyo kya li halala na avaheyi.

¹⁹U haananga munwa gugwo ku ubudamano, Na ululimi lu lombanga ubugadi.

²⁰Wikalanga kuvola gokuvukira amwavo wowo Na u hilanga tsimbemba ku mwana wa mama wowo.

²¹Vindu yivi u koli, navutswa nda kiring'ana; Ive wa ganagana inze mbeye kuli ive: Navutswa nda ku ha amageli, na nda ku lohidzira imbiri wetsimoni tsitsyo.

²²Kalunu mu ganagane yiki, mwinye aviviriranga Nyasaye Gase nda mu donyannya, na a vule wokuhonnya:

²³Kuvo vosi u haana kihaanwa kyelisantidza u nkuminyanga; Na ku uyu u lohidzanga inzira yeye Nda mu mannya ubuhonnyi bwa Nyasaye.