Read lulogooli Zaburi 52 Bible Online

Zaburi 52 - lulogooli bible

Zaburi 52

¹Kigira ki wiidzominya mu mahyolo, O wetsingulu? Tsimbabasi tsya Nyasaye tsihindiranga kazozo.

²Ululimi lulwo lu lombanga vidamano, Kuli lugembe Iwugi, lu kolanga ubugadi.

³Ive u yanzanga ubudamano kuvita ubulahi, Na u yanzanga ububehi kuvita makuva agobulungi. [Selaha

⁴U yanzanga makuva gosi agokumira, O ive, ululimi lwobugadi.

⁵Kandi ndiyo, Nyasaye a lononnya ive mihiga nemihiga; A la ku gumira kukutwulidza mu lihema lilyo, Nokukwiha ku kivala kya ava veye mwoyo. [Selaha

⁶Kandi avalungi va la ga lola, nokutia, Va la mu seka, nokuvola,

⁷Henza, uyu a veye mundu wa vula kukola Nyasaye lugaga lwilwe, Navutswa ya suuvira ubunyingi bwobutugi bwibwe, Na yesingeridza mwene mu ubudamano bwibwe.

⁸Navutswa inze mbeye kuli muzeituni muvisi mu inyumba ya Nyasaye: Inze nsuuviranga tsimbabasi tsyobuyanzi tsya Nyasaye mihiga nemihiga.

⁹Nda santidza ive mihiga nemihiga, kigira wa ga kola; Na nda lindirira lieta lilyo, kigira li veye lilahi, imbiri wa avatakatifu vovo.