Read lulogooli Zaburi 55 Bible Online

Zaburi 55 - lulogooli bible

Zaburi 55

¹U tegidze amatu ku lisaala lyange, O Nyasaye; Na u tivisa mwene ku lihomba lyange.

²U mbulire, na u ntivulire: Inze mboyaboyanga mu lisyoma lyange, nokukenya,

³Kigira mwoyo gwa vasigu, Na kigira lidambidza lya vadamano; Kigira va vika ubudamano ku inze, Na mu livihirirwa va ndambidza.

⁴Mwoyo gwange gu saliranga ligali mugati mwange: Na litihidza lyelikudza li duki ku inze.

⁵Ubutii na lidegera vi duki ku inze, Ubutii bunene bu nguuti ligali.

⁶Na nda vola, Nkano mbeye netsimbaha kuli tsyelikuulu Kunangwa nda buluka nokusosa.

⁷Henza, ma nda voyavoya ihale, Na nda menya migendanyama. [Selaha

⁸Nda kola bwangu kuhona Ku kihudzudzi noku kihi.

⁹O Mwami wononnye, na u salannye tsinimi tsyavo; Kigira ndoli kirage na ubutindi mu lidala.

¹⁰Mbasu nobudiku va likumbiridzanga ku madigi: Ubudamano na kivi vi veye hagati halyo.

¹¹Ubudamano bu veye hagati halyo: Lidambidza na ubugadi si vi twula ku tsinzira tsyalyo.

¹²Kigira si a li musigu wa nyeganga inze; Na a va musigu nkano nda nyala kwekudzira kuye: Kandi si a li u ndunyira, wegingira ku inze; Kunangwa ndevisa kuye:

¹³Navutswa ya li ive, mundu wakyange, Wakye wange, mulina wange wa kwa manyana naye.

¹⁴Kwa volerana makuva agobugasu: Kwa tsia mu inyumba ya Nyasaye halala nekiduma.

¹⁵Likudza li va dukire bwangu, Va tsie mu Kihadisi ni va kikiri mwoyo Kigira ubudamano bu veye mu limenya lyavo, na hagati havo.

¹⁶Na ku inze, ndanira Nyasaye; Na Yahova a la mbonnya.

¹⁷Mgolova na mugamba na mbasu hagati, nda lira, na nda kenya; Naye a la hulira mwoyo gwange.

¹⁸Naye u honnya mwoyo gwange mmirembe ku ubulwani bwa li ku inze; Kigira va li avanyingi ava luana ninze.

¹⁹Nyasaye a la va hulira nokuvativulira, Kali uyu a hindiranga kutwula kale. [Selaha Ava vula kulola ligirunkana, Kandi ava ta tia Nyasaye.

²⁰Ya nyira makono gege kuvo ava li nemirembe naye: Yononnya lilagana lilye.

²¹Munwa gwigwe gwa li muterere kuvita maguta, Navutswa mwoyo gwigwe gwa li ubulwani: Makuva gege ga li madoto kuvita maguta, Navutswa ga li vivavi visomole.

²²U vike ku Yahova ubuliduhu bubwo, naye a la ku vika tsingulu: Si a la leka avalungi va sundwe.

²³Navutswa ive, O Nyasaye, u la vikidza kuduka mbogo bwobwoneku: Avandu avekisahi na avagadi si va la hindira kuduka inusu ya madiku gavo; Navutswa inze nda suuvira ive