Read lulogooli Zaburi 59 Bible Online

Zaburi 59 - lulogooli bible

Zaburi 59

¹U mbonnye ku avasigu vange, O Nyasaye wange: U nkonye ku yava avegingira avene ku inze.

²U mbonnye ku yavo ava kolanga ubudamano, Na u mbonnye ku avekisahi.

³Kigira, henza, va setera mwoyo gwange; Avetsingulu vevungidza avene ku inze: Si ga veye kigira mahyolo gange, kinga ubwoni bwange, O Yahova.

⁴Va nyagula nokwetegekidza avene bugira lihyolo lyange: U vuke kunkonya, na u henze.

⁵Kali ive, O Yahova, Nyasaye wa mahe, Nyasaye wa Israeli, U vuke kuhenza tsihiri tsyosi: U ta vererera, kali mulala ku avekirage kinene. [Selaha

⁶Inyinga ya mgolova virana, va loka kuli imbwa, Na va kumbiridza lidala.

⁷Henza, va vezegeranga mu munwa gwavo; Vivavi vi veye mu minwa gyavo: Kigira ra tera, Ibwaha u huliranga?

⁸Navutswa ive, O Yahova, u la va seka; U la kolera tsihiri kihenyahenye.

⁹Kigira tsingulu tsitsye, inze nda ku lindirira; Kigira Nyasaye a veye impinga yange.

¹⁰Nyasaye wange a la mbuganira netsimbabasi tsitsye: Nyasaye a la mba kwumika avasigu vange.

¹¹U ta viita mba, gase avandu vange va livirira: U va salannye netsingulu tsitsyo, na u va gehidze, O Mwami, ingavo yetu.

¹²Kigira ubwoni bweminwa gyavo, na makuva geminwa gyavo, Va gumirwe mu ubwigingiri bwavo, Na kigira ubunyegi na ubugadi bwa va volarlga.

¹³U va heridze mu livihirirwa, u va heridze kuduka va ta va ho kandi: Va duke kumanya Nyasaye yameha mu Yakobo Kuduka ku kiheri kyelirova [Selaha

¹⁴Na inyinga ya mgolova virane, nokuloka kuli imbwa, Nokukumbiridza lidala.

¹⁵Va la voyavoya, venyanga vyokulia, Va la linda ubudiku bwosi bei, ni va vula kwiguta.

¹⁶Navutswa inze ndimba ku tsingulu tsitsyo; Yee, nda sangalira ku tsimbabasi tsitsyo mugamba: Kigira ive u veye ku inze hokwi visa mu hange hanene, Na hokuhonera hange mu lidiku lyekivi.

¹⁷Ku ive, O tsingulu tsyange, ndimba tsyokwidzominya: Kigira Nyasaye a veye impinga yange, Nyasaye wetsimbabasi tsyange.