Read lulogooli Zaburi 62 Bible Online

Zaburi 62 - lulogooli bible

Zaburi 62

¹Mwoyo gwange gu lindirira Nyasaye nelikiring'ana: Lihonywa lyange li twulanga kuye.

²Uyu yeng'ine a veye lwanda lwange na lihonywa lyange: A reye impinga yange; si nda dendeya ligali.

³Kuduka inyinga ki mu la twulira mundu, Mu duke kumwiita, mwinye vosi? Kuli lidigi li yekanga, kuli lwevo lu dendeyanga?

⁴Va volerana avene kugehidza lidzominywa lilye; Va sangalira ububehi; Va gasidzanga nomunwa gwavo, Navutswa mu myoyo gyavo va kyenanga. [Selaha

⁵Mwoyo gwange, u lindire Nyasaye yeng'ine nelikiring'ana; Kigira lisuuvira lyange li veye ku uyu.

⁶Uyu yeng'ine a veye lwanda na lihonywa lyange: A veye hokwivisa mu hange; si nda dengeya mba.

⁷Nyasaye a veye lihonywa lyange na ubukumi bwange: Lwanda lwetsingulu tsyange, na hokwivisa mu hange vi veye mu Nyasaye.

⁸Mwinye avandu mu mu suuvire tsinyinga tsyosi; Mu tsuke mwoyo gwenyu imbiri wewe: Nyasaye a veye hokwivisa mu hetu. [Selaha

⁹Ligali avandu ava hanzahanza va veye vyavutswa, na avandu avanene va veye ububehi: Mu tsiratili va la gingika; Vosi halala va veye avahuhu kuvita mwika.

¹⁰Mu ta suuvira lidambidza, Mu tegingira ku lilanya lyenyu: Ubutugi ni bu medeka, u ta bu vika mu mwoyo gugwo.

¹¹Nyasaye u voye lulala, Hali kaviri mbuliye yaga, Tsingulu tsi veye tsya Nyasaye.

¹²Kandi tsimbabasi tsyobuyanzi tsi veye tsitsyo, O Mwami; Kigira u tunganga ku avandu sa mulala kuli miyinzi gyigye.