Read lulogooli Zaburi 63 Bible Online

Zaburi 63 - lulogooli bible

Zaburi 63

¹O Nyasaye, ive u veye Nyasaye wange; nda kivira kwenya ive: Mwoyo gwange gu veye nobuluhu ku ive, mubiri gwange gwenya nga ive Mu kivala kyumu nokuluhidza, ha amadzi ga vula.

²Na ndiyo nku henzi mu hatakatifu, Kulola tsingulu tsitsyo na ubukumi bubwo.

³Kigira tsi nbabasi tsyobuyanzi bubwo tsi veye tsindahi kuvita livamwoyo, Minwa gyange gyi lidzominya ive.

⁴Na ndiyo nda ku gasidza lwa mbeye mwoyo: Nda ginga makono mu lieta lilyo.

⁵Mwoyo gwange gu liguta kuli gu veye nobuhaali na maguta Munwa gwange gu la kwidzominya neminwa gyobusangali;

⁶Lwa ndidzulitsa ive ku kitali kyange, Na nganagananga ive inyinga yobudiku.

⁷Kigira ive u veye mukonyi wange, Kandi mu kiriri kyetsimbaha tsitsyo, nda sangala.

⁸Mwoyo gwange gu londanga ive ligali: Mukono gugwo mulungi gu singeridza inze.

⁹Navutswa yavo avenyanga mwoyo gwange kugwononnya, Va la tsia musi mwelirova.

¹⁰Va la vikwa mu tsingulu tsyekivavi: Va la va kidieli kyevibwe.

¹¹Navutswa mwami a la sangala mu Nyasaye: Ku vosi wisuhanga kuye a lidzominya; Kigira minwa gya yava ava vola ububehi gyi la kunikwa.