Read lulogooli Zaburi 68 Bible Online

Zaburi 68 - lulogooli bible

Zaburi 68

¹Nyasaye a vuke, avasigu veve va salanywe; Kandi vosi ava mu dunyira viruke imbiri wewe.

²Kuli mwoki gu hudzangwa, va hudzwe ndiyo: Kuli amasang'asa ga salulukanga ku muliru Na ndiyo avadamano va dive imbiri wa Nyasaye.

³Navutswa avalungi va sangalena va tsantsalike imbiri wa Nyasaye: Yee, va sangale nobusangali.

⁴Mwimbire Nyasaye, mwimbe kwidzominya lieta lilye: Mu mu lungekidzire inzira uyu u ninanga kugenda mu kyanga langwi. Lieta lilye li veye Yahova; mu sangale imbiri wewe.

⁵A veye dada wa avabisandu, na mukalagi wavakunzakali, Ni Nyasaye mu ubumenyi bwibwe butakatifu.

⁶Nyasaye a vikanga vaderwa mu bwiko: A boholola avahambe kuvavika mu bwelemeridzi; Navutswa avatinguha va la menya mu kivala kyumu.

⁷O Nyasaye, lwa wimirira avandu vovo Lwa wa tsia ho mkyangalangwi; [Selaha

⁸Lirova lya degera, Kandi ligulu lya tonyatonya imbula imbiri wa Nyasaye: Kali Sinai kila kya degera imbiri wa Nyasaye, Nyasaye wa Israeli.

⁹Ive, O Nyasaye, wa kupidza imbula inyingi, Miyandu gyigyo lwa gya li ni gyi kudzi mwoyo, wa gyi singeridza.

¹⁰Livugana lilyo lya menya mugyo: Ive, O Nyasaye, wa lombera avadaka mu ubulahi bubwo.

¹¹Mwami a haana makuva: Avakali ava ga landidza va veye kiduma kinene.

¹²Avami va amahe viruka, viruka; Mukali u menya yengo a gavulannya vilanye.

¹³Kali ni mu goni hagati hevigo vyamagondi, Mu la va kuli tsimbaha tsyelikuulu tsi kunikwa nefetha, Na mabaha galyo ga kunikwa nethahabu.

¹⁴Lwa Wanyala Vyosi ya salannya avami mu. Kya li kilavu kuli likonza mu Zalimon.

¹⁵Kigulu kya Bashan ki veye kigulu kya Nyasaye; Kigulu kya Bashan ki veye kigulu kitambi.

¹⁶Mwinye vigulu vitambi, kigira ki mu henzera nembodoka, Kigulu kya Nyasaye ya tovola kumenya mu? Yee, Yahova a la menya mukyo mihiga nemihiga.

¹⁷Magari ga Nyasaye ga veye tsielfu makumi gaviri, kali tsielfu netsielfu: Nyasaye a veye hagati hago, kuli mu Sinai, mu hatakatifu.

¹⁸Ive u nini migulu, u lanyi avahambe; U vuguliye avandu vihaanwa Yee, kali vya avatinguha, Yahova Nyasaye a menye ho.

¹⁹Mwami a gasidzwe, madiku na madiku a ku gingira misigo gyetu, Naye niye Nyasaye u veye ubuhonnyi bwetu. [Selaha

²⁰Nyasaye a veye ku kwinye, Nyasaye wobuhonnyi; Yahova Mwami a veye mwene lihonnya mu likudza.

²¹Nyasaye a la duya mitwe gyavasigu veve, Na ligodo lyelisu lya uyu wedinyeridza mu mahyolo gege.

²²Mwami a vola, Nda va twulidza mu Bashan, Nda va leta kandi kutwula mu luliva lwenyanza;

²³Ive u duke kwina kirenge mu masahi, Tsinimi tsyetsimbwa tsitsyo tsi nyole tsyatsyo ku vasigu rovo.

²⁴Va loli ligenda lilyo, O Nyasaye, Kali ligenda lya Nyasaye wange, Mwami wange, kutsia mu hatakatifu.

²⁵Avetsinyimbu vimirira, na avakupa ubukana bwokwimba va londa, Na hagati havakana ava kupanga vyolugano lwesugudi

²⁶Mu gasidze Nyasaye mu livugana, Kali Mwami, muinye avekisenukiru kya Israeli.

²⁷A veye ho, muke Benjamini mwamehi wavo, Avanene va Yuda na kina kyavo Avanene va Zebuloni, na avanene va Nafitali.

²⁸Nyasaye wowo u lagi tsingulu tsitsyo: O Nyasaye, u dinyeridze aga u ku koleye.

²⁹Kigira litempeli Iilyo liveye mu Yerusalemi Avami va la ku letera vihaanwa.

³⁰U gaye kiduma kya avamatimu, Kiduma kyetsigiriki, halala nevimoli vyavandu, Sa mulala yegehidza nokuleta vihaanwa vyefetha: U salannyi avetsihiri ava yanza ubulwani.

³¹Avanene va la twula Egepeti; Ethiopia nonoho va la nyira ma kono gavo ku Nyasaye.

³²Mwimbire Nyasaye, mwinye avobwami bwelirova; Mwimbe tsinyimbu tsyokwidzominya Mwami; [Selaha

³³Ku uyu u ninanga ku ligulu lyeligulu, li veye lya kale; Henza, a kupa lwanga, mwoyo munene

³⁴Mu vole ku Nyasaye, a veye netsi ngulu: Ubunene bwibwe bu veye igulu ku Israeli, Na tsingulu tsitsye tsi veye ku malesi.

³⁵O Nyasaye, u veye welitihidza kutwula mu hatakatifu hoho: Nyasaye wa Israeli, a haananga tsingulu na ubunyali ku avandu veve. Nyasaye a gasidzwe.