Read lulogooli Zaburi 72 Bible Online

Zaburi 72 - lulogooli bible

Zaburi 72

¹O Nyasaye, u he mwami likalaga lilyo, Na ubulungi bubwo ku mwana womwami.

²A la kalagira avandu vovo nobulungi, Na avadaka vovo nobulungi.

³Vigulu vi la letera avandu mirembe, Kandi tugulu, mu bulungi.

⁴A la kalagira avadambi va avandu A la honnya avana va avadaka Na a la shonolannya mudambidzi.

⁵Va la ku tia inyinga yosi yeliuva li hindira ho, Kandi inyinga yomweli kuduka ku visukululwi vyosi.

⁶A lika ku lirova kuli imbula i kupanga ku ubulimu bu kalageywi, Kuli imbula yamadzi mavovo ku lirova.

⁷Mu madiku gege avalungi va la gasidzwa, Na mirembe minyingi kuduka mweli gu fweye.

⁸A lameha kutwula ku inyanza yiyi nokuduka ku yiyi Kandi kutwula ku Mugera kuduka ku kiheri kyelirova.

⁹Ava menya mwigendanyama va linama imbiri wewe; Na avasigu veve va la komba ulugukyi.

¹⁰Avami va Tarshishi na avevisulu va la leta ubusutu: Avami va Sheba na Seba va la leta vihaanwa.

¹¹Yee, avami vosi va la mu sigamira; Na tsihiri tsyosi tsi la mu tumekira.

¹²Kigira a la honnya mudaka inyinga yanira, Na mudambi u ta li nomukonyi.

¹³A la vererera mudaka, na avadambi, Na a la honnya myoyo gyava dambi.

¹⁴A la honnya myoyo gyavo gyi twule mu lidambidzwa nomu linuulwa; Na masahi gavo ga la va nobugulibudinyu imbiri wewe:

¹⁵Na va la hindira; naye a la hebwa ithahabu ya Sheba: Na avandu va la mu saalira kazozo; Va la mu gasidza lidiku lyosi.

¹⁶Ha la va nobuswage bunyingi mu lirova ku isonga ye vigulu; Makuyu galyo ga la dengeya kuli Lebanon: Na yavo avelidala va la gasidzwa kuli bunyasi bwelirova.

¹⁷Lieta lilye li hindira mihiga nemihiga; Lieta lilye li la hongera kuva kuli liuva: Na avandu va la gasidzwa muye; Tsihiri tsyosi tsi la mu goha mugasu.

¹⁸A gasidzwe, Yahova Nyasaye, Nyasaye wa Israeli, U veye yeng'ine mu likola vyokugenya:

¹⁹Lieta lilye lyobukumi li gasidzwe mihiga nemihiga Lirova lyosi lizuye ubukumi bwibwe. Amini, na Amini.

²⁰Lisaala lya Daudi mwana wa Jesse li tweki.