Read lulogooli Zaburi 77 Bible Online

Zaburi 77 - lulogooli bible

Zaburi 77

¹Ndanira Nyasaye nomwoyo gwange, Kali ku Nyasaye nomwoyo gwange; naye a la mbulira.

²Mu lidiku lyelidambidzwa lyange ndenya Yahova: Mukono gwange gwa nyirwa ubudiku, si gwa dengeya mba; Mwoyo gwange gwa sula kuleminywa.

³Ndidzulitsa Nyasaye, na mbenda mwoyo: Mmonya, na mwoyo gwange gwa kudza. [Selaha

⁴Ive u kola vigohe vi kunule tsimoni tsyange: Inze mbenda mwoyo kuduka si nyala kuvola.

⁵Nganagani madiku ga kale, Mihiga gya madiku ga vita.

⁶Ndidzulitsa ulwimbu lwange lwobudiku: Mbolerana nomwoyo gwange; Na roho gwange gwidera ligali.

⁷Mwami a la kunga mundu mihiganemihiga? Si a la mu vera kandi?

⁸Tsimbabasi tsitsye tsyobuyanzi tsi heri ligali mihiga nemihiga? Na lisuuviridza lilye li divi kuduka makula na makula?

⁹Nyasaye yiviriye tsimbabasi tsitsye? A bohi mubutima, tsimbabasi tsitsye? [Selaha

¹⁰Kandi nda vola, Yibu bu veye ubudedekere bwange; Navutswa ndidzulitsa mihiga gyomukono mulungi gwa U Veye Igulu Ligali.

¹¹Nda landidza amakuva gelikola lya Yahova; Kigira ndidzulitsa vyokugenya vivyo vya kale.

¹²Yee, nda ganagana miyinzi gyigyo. Ndidzulitsa likola lilyo.

¹³O Nyasaye, inzira yoyo i veye mu hatakatifu: Ibwaha u veye munene kuli Nyasaye?

¹⁴Ive u veye Nyasaye u kolanga vyokugenya: U lang'aminyi tsingulu tsitsyo ku avetsihiri.

¹⁵U nanuye avandu vovo nomukono gugwo, Avana va Yakobo na Yosefa. [Selaha

¹⁶Amadzi ga ku lola, O Nyasaye; Amadzi ga ku lola, ni ga nyola ubutii: Amadzi goluliva kandi, ga degera.

¹⁷Amalesi ga tsuka amadzi; Na ligulu lya leta mwoyo: Na mibano gyigyo gya landa.

¹⁸Mwoyo gwenkupa yoyo gwa li mukihudzudzi; Tsimpeni tsya hemahema mu lirova: Lirova lya degera, nokudengeya.

¹⁹Muhanda gugwo gu veye mu inyanza, Na tsinzira tsitsyo tsi veye mu amadzi manene Na ligenda lilyo si li manyekana mba.

²⁰Wimirira avandu vovo kuli mwimiriri wekyayo, Nomukono gwa Musa na Haruni.