Read lulogooli Zaburi 81 Bible Online

Zaburi 81 - lulogooli bible

Zaburi 81

¹Mwimbe ligali ku Nyasaye u veye tsingulu tsyetu: Mu kole isango ku Nyasaye wa Yakobo.

²Mu ginge ulwimbu, mu kupe isugudi,] Ubukana bwomwoyo gwokuyanzidza halala nobukana bwemigoye likumi.

³Mu kupe kisiliva inyinga yomweli muhya, Mu inyinga yomweli gu kyera, ku lidiku lyelilia lyetu.

⁴Kigira li veye lilaga lya Israeli, Likalaga lya Nyasaye wa Yakobo.

⁵Ya haana munwa li ve lilolekidza mu Yosefa, Lwa ya twula mu kivala kya Egepeti, Ha mbulira ululimi lwa nta manya.

⁶Nda twulidza livega lilye ku musigo: Makono gege ga twulidzwa ku kihinda.

⁷Mu kivi wanira, na inze nda ku honnya; Nda ku tivulira mbuvisi bwenkupa; Nda ku geridza ha amadzi ga Meriba. [Selaha

⁸Mu hulire, mwinye avandu vange, na nda ku lolekidzira: O Israeli nkano u hulire inze

⁹Si u la va no munyasaye mugeni; Kandi u ta sigamira munyasaye wobugeni.

¹⁰Inze mbeye Yahova Nyasaye wowo, Wa ku twulidza mu kivala kya Egepeti: Kunula ligali munwa gugwo, na inze nda kwizulitsa.

¹¹Navutswa avandu vange si va hulira mwoyo gwange; Na Israeli si venya inze.

¹²Kunangwa nda va leka kulonda mwoyo gwavo mudinyu, Va duke kugenda mu makuva gavo avene.

¹³O nkano avandu vange va mbulire, Na Israeli nkano va gende mu tsinzira tsyango

¹⁴Inze nkano nda guuta avasigu vavo bwangu, Nokwirannya mukono gwange ku vadambidzi vavo.

¹⁵Yavo ava dunyira Yahova nkano vegehidza kuye: Navutswa tsinyinga tsyavo tsi la menya mihiga nemihiga.

¹⁶Naye nkano a va lageridza ubunolu bwengano; Nokukwigutidza nobwuki bwomulwanda.