Read lulogooli Zaburi 89 Bible Online

Zaburi 89 - lulogooli bible

Zaburi 89

¹Ndimba tsimbabasi tsyobuyanzi tsya Yahova mihiga nemihiga: Nomunwa gwange nda lolekidza ubusuuvirifu bubwo ku makula gosi.

²Kigira mbola, Tsimbabasi tsi lombakwa mihiga nemihiga; Ubusuuvirifu bubwo u la singeridza mu ligulu lyene.

³Nombi lilagana nomutovole wange, Nzisuhiye Daudi mutumekiri wange:

⁴Kisukululwi kikyo nda singiridza mihiga nemihiga Na ndombaka intebe yobwami bubwo ku makula gosi. [Selaha

⁵Magulu ga lidzominya vyokugenya vivyo, O Yahova; Na ubusuuvirifu buhwo mu livugana lyavatakatifu.

⁶Kigira migulu ha veye na bwaha u nyala kuleng'anywa na Yahova? Na ibwaha a veye kuli Yahova mu avana vetsingulu,

⁷Nyasaye welitihidza mu livugana lyavatakatifu, Nokutibwa kuvita yavo vosi ava mu kumbiridza?

⁸O Yahova Nyasaye wa mahe, Ibwaha u veye wetsingulu, kuli ive, O Yahova? Na ubusuuvirifu bubwo bu ku kumbiridza hosi.

⁹Ive wamehanga uluyai lwenvanza: Viguvuli v yayo lwa vyegingira, ive u vi kiring'annya.

¹⁰Ive u shonolannyi Rahabu kuli wiiteywi; U salanyi avasigu vovo nomukono gwetsingulu tsitsyo.

¹¹Magulu na gogo, na lirova kandi ni lilyo: Avelirova na vizula vyalyo, ive wa vi lomba muse.

¹²Kasikasini na kusini, ive wa vi lomba: Taboru na Herimon vi sangala mu lieta lilyo.

¹³U veye nomukono gwobunyali; Mukono gugwo gu veye netsingulu, mukono gugwo mulungi gu veye munene.

¹⁴Ubulungi na likalaga vi veye muse vwentebe yobwami bubwo: Tsimbabasi na ageligali vimiriranga imbiri wetsimoni tsitsyo.

¹⁵Avandu ava manya isango va veye nobugasu: O Yahova, va gendanga mu bulavu bwommoni mumwo.

¹⁶Mu lieta lilyo va sangala lidiku lyosi bei; Na mu bulungi bubwo va nenehidzwa.

¹⁷Kigira ive u veye ubukumi bwetsingulu tsyavo; Na mu bulahi bubwo ulwiga lwetu lu la nenehidzwa.

¹⁸Kigtra ingavo yetu i veye ya Yahova; Na Mutakatifu wa Israeli a veye Mwami wetu.

¹⁹Kunangwa wa volera avatakatifu mu liloto, Na wa vola, Mbiki ubukonyi ku mulala wetsingulu; Nnenehidzi mulala mutovole ku avandu.

²⁰Nyoye Daudi mutumekiri wange; Mmu vaki namaguta gange matakatifu:

²¹Wekigalo kyange ki la luvirira kuye Na mukono gwange gu la mu vika tsingulu.

²²Musigu si a la mu dambidza, Kandi mwana wobudamano si a la mu kupidza kivi.

²³Nda donyannya avasigu veve imbiri wewe Nda kuya yavo ava mu dunyira.

²⁴Navutswa ubusuuvirifu bwange na tsimbabasi tsyange tsi la va halala naye; Na mu lieta lyange ulwiga lwilwe lu la kuminywa.

²⁵Na nda vika mukono gwigwe ku inyanza Na mukono mulungi gwigwe ku migera.

²⁶A lanira ku inze, Ive u veye dada wange, Nyasaye wange, na ulwanda lwobuhonyi bwange.

²⁷Kandi nda mu kola kuva wokutanga kwivulwa wange, Na munene ku avami velirova.

²⁸Tsimbabasi tsyange nda mu lindira mihiga nemihiga; Na lilagana lyange li la singira halala naye.

²⁹Kisukululwi kikye kandi nda kola kumenya mihiga nemihiga, Na intebe yeye yobwami kuli madiku gomigulu.

³⁰Avana veve ni va leka malago gange, Na va vula kugenda mu likalaga lyange;

³¹Ni vononnya munwa gwange, Na va vula kugumira amalago gange;

³²Hene yaho nda va kuya nempimbo kigira mahyolo gavo, Na nda va kuya kigira ubukyamu bwavo.

³³Navutswa tsimbabasi tsyange nda vula kutwulidza kuye ligali, Kandi si nda leka ubusuuvirifu bwange kugwa.

³⁴Si nda vunannya lilagana lyange, Kandi si nda girunkannya aga twula mu minwa gyange.

³⁵Inyinga indala ndisuha ku ubutakatifu bwange; Si nda veha ku Daudi mba:

³⁶Kisukululwi kikye ki la hindira mihiga nemihiga, Na intebe yeye yobwami kuli liuva imbiri wange.

³⁷I la dinyiridzwa mihiga nemihiga kuli mweli, Na kuli lilolekidza lyobusuuvirifu lyomigulu. [Selaha

³⁸Navutswa ive wa sikisi na wambakani, Na u dunyiye mbake wowo.

³⁹U suye lilagana lyomutumekin wowo: Wa guluye itaji yeye kali ku lirova.

⁴⁰Wononnyi tsinzebo tsitsye tsyosi; U koli madigi gege kuva madivi.

⁴¹Vosi ava vitanga ku inzira va mu fwula: U gwiye kyokulegwa ku vatende veve.

⁴²U nenehidzi mukono mulungi gwavasigu veve; U yanzidzi avasigu veve vosi.

⁴³Yee, u duhidza ubwogi bwekivan kikye, Na u vuli kumusingeridza mu bulwani.

⁴⁴U heridzi ubunifu bwibwe Na u tsomi hasi intebe yobwami bwibwe.

⁴⁵U gehidzi madiku gobusoleri bwibwe: U mu viki tsisoni. [Selaha

⁴⁶Kuduka inyinga ki, O Yahova? U levisa mihiga nemihiga? Kuduka inyinga ki ubutima bubwo bu laaka kuli muliru?

⁴⁷Widzulitse kuli inyinga yange i veye inkekeke ndi: U lombeye vyavutswa ki avans va avandu vosi

⁴⁸Ni mundu ki u li hindira kazozo a vule kulola likudza U nyala kwehonnva mwene mu mukono gwe Kihadisi? [Seleha

⁴⁹Yahova, Tsimbabasi tsitsyo tsya kale tsi veye haliha, Tsya wesuhira Daudi mu busuuvirifu bubwo?

⁵⁰Widzulitse, Mwami, linyegwa lyavatumekiri vovo Kuli ng'inga mu kiritu kyange amanyego gavandu vosi vetsingulu,

⁵¹Aga vasigu vovo va nyeganga, O Yahova Na aga va nyeganga virenge vyombake wowo.

⁵²Yahova a gasidzwe mihiga nemihiga. Amini, na Amini.