Read lulogooli Zaburi 9 Bible Online

Zaburi 9 - lulogooli bible

Zaburi 9

¹Ndidzominya Yahova na mwoyo gwange gwosi Nda lang'aminnya vikolwa vivyo vyosi vyokugenya.

²Nda sangala nokuyanza mu ive Ndimba tsinyimba tsyokwidzominya lieta lilyo, O Ive U Veye Igulu Ligali.

³Lwa avasigu vange va haalidzwa, Vikigitala nokudiva imbiri wowo.

⁴Kigira ive u lungikidzi liva lyange, na kiyalo kyange; Wikalanga ku intebe yobwami u kalaganga nobulungi.

⁵Ive u gondokeye tsihiri, u dividzi avadamano, Weyi lieta lyavo mihiga ne mihiga.

⁶Avasigu va hera, va la va hatswa mihiga nemihiga; Na madala ga ive u dividzi, Kali kyokugidzulitsa ki divi ligali.

⁷Navutswa Yahova yikala kuli muami mihiga nemihiga: Intebe yeye yobwami u gi viki ku likalaga;

⁸Naye a la kalagira avelirova mu bulungi, Na a la kalagira avandu mu bulungi.

⁹Kandi Yahova a la va lugaga lunene lwa va dambidzwa, A la va lugaga lunene mu tsinyinga tsyekivi;

¹⁰Navo ava manya lieta lilyo va la suuvira ive; Kigira ive, Yahova, si u leki ava kwenya ive.

¹¹Mwimbe kwidzominya Yahova, u menya ku Zioni: Mu landidze vikolwa vivye hagati ha avandu.

¹²Kigira uyu u vanzanga kisalya a vidzulitsanga Si yivirira lilira lyavadambidzangwa.

¹³U mbere tsimbabasi, O Yahova; U lole kivi kyange ki twulanga ku yavo ava ndunyira, Ive u ntwulidzanga ku viribwa vyelikudza;

¹⁴Nduke kulang'aminya lidzominya lilyo lyosi. Mu viribwa vyomukana wa Zioni Nda sangala mu buhonyi bubwo.

¹⁵Tsihiri tsi gwiye mu bogo bwa va yava avene: Mu mutego gwa va visa, kirenge kyavo ki hambwa mu.

¹⁶Yahova yelolekidzi mwene, a lombi likalaga: Mudamano u tegeywi mu likola lyamakono gege mwene. (Higaion. Selaha)

¹⁷Avadamano va lirannywa mu Kihadisi, Kali tsihiri tsyosi tsivirira Nyasaye.

¹⁸Kigira avadaka si va livirirwa kazozo mba Kandi lihenzerera lyavadambi si li la gota mihiga nemihiga.

¹⁹U singire, O Yahova; u ta leka mundu a guute: Tsihiri tsi kalagirwe imbiri wowo.

²⁰U vike ubutii kuvo, O Yahova: Avetsihiri va duke kumanya avene kuva avandu vutswa [selaha