Read lulogooli Zaburi 90 Bible Online

Zaburi 90 - lulogooli bible

Zaburi 90

¹Mwami, u veye ubumenyo bwetu Mu makula gosi.

²Lwa vigulu vi kikiri kulombwa, Kinga lwa u kikiri kulomba lirova na vyomulirova Kutwula mihiga nemihiga, kuduka mihiga nemihiga, ive u veye Nyasaye.

³Ive u girunkannya avandu ku ubudivi, Na u vola, Mwirane, mwinye avana va avandu.

⁴Kigira mu tsimoni tsitsyo mihiga elfu Gyi veye kuli lidiku lyomgolova lwa li viti, Na kuli lilinda lyobudiku.

⁵U va hilanga kuli lihila lyamadzi; va veye kuli tsindolo: Mugamba va veye kuli bunyasi bu virukanga.

⁶Mugamba bu sebukanga, nokuviruka; Mgolova bu timulangwa, na bu niala.

⁷Kigira kwinye ku divanga mu butima bubwo, Na ku kupidzwa kivi mu livihirirwa lilyo.

⁸Ive u viki tsimbi tsyetu imbiri wowo, Ubwoni bwetu bu viseywi u viki mu bulavu bwommoni mumwo.

⁹Kigira madiku getu ga vita mu butima bubwo: Ku heridza mihiga gyetu kuli lugano lu voleywi.

¹⁰Madiku gemihiga gyetu ga veye mihiga makumi gatano na gaviri, Kinga ku tsingulu gyi nyala kuduka makumi gatano na gavaka; Navutswa uluyai lwagyo lu veye miyinzi na livererera vutswa; Kigira gyi vita bwangu na ku vita.

¹¹Ibwaha u manya tsingulu tsyobutima bubwo Kandi ubutima bubwo kuli litibwa li dukana nive?

¹²U kwegidze ndi kuvalidza madiku getu, Ku duke kwenyolera mwoyo gwobugeeri.

¹³Wirane, O Yahova; kuduka inyinga ki? U vererere avatumekiri vovo.

¹⁴Mugamba u kwigutidze tsimbabasi tsyobuyanzi tsitsyo, Ku duke kuyanza nokusangala madiku getu gosi.

¹⁵U ku yanzidze kuli livalidza lya madiku ga wa ku kupidza kivi Na kuli mihiga gya kwa lola ubudamano.

¹⁶Miyinzi gyigyo gyi loleke ku avatumekiri vovo, Na ubukumi bubwo ku avana vavo.

¹⁷Na ubulahi bwo Mwami Nyasaye wetu bu ve ku kwinye; Na u singeridze miyinzi gyamakono getu ku kwinye; Yee, miyinzi gyamakono getu u gyi singeridze.