Read lulogooli Zaburi 94 Bible Online

Zaburi 94 - lulogooli bible

Zaburi 94

¹O Yahova, ive Nyasaye umbanzi wekisalya Ive Nyasaye umbanzi wekisalya, u ng'ereng'ane.

²Wekumuminye ive, mukalagi welirova: U he avoluya; ki dukana navo.

³O Yahova, kuduka inyinga ki avekirage Tsinyinga tsyanga avadamano va la guuta?

⁴Va demannyanga, ni va vola nobwekonyi: Vosi ava kolanga ubudamano va veye mu lyekonya.

⁵O Yahova, va shonolannya avandu vovo, Nokukupidza kivi miyandu gyigyo,

⁶Viita mukunzakali na mugeni, Nokwiita avabisandu.

⁷Na va vola, Yahova si a la lola Kandi Nyasaye wa Yakobo si a la henza.

⁸Mwinye ave liva lyetsinyama mu avandu, mu ganagane; Na mwinye avasiru, inyinga ki mu la va avobugeeri?

⁹Uyu ya simika ugutu, si a la hulira? Wa lomba imoni, si a la lola?

¹⁰Uyu u homatidzanga avetsihiri, si a la va ha amageli Kali uyu wegidzanga mundu ubugeeri?

¹¹Yahova a manya tsiganagani tsyomundu, Kigira tsi veye mwika vutswa.

¹²A veye nobugasu mundu wa ive u hedzanga amageli, O Yahova, Na wa wegidzanga amalago gogo;

¹³Ive u duke kumusosidza mu madiku gekivi Kuduka inyinga yo bogo bu yavirwa avadamano.

¹⁴Kigira Yahova si a lesigana avandu veve, Kandi si a la leka miyandu gyigye.

¹⁵Kigira likalaga li lirana ku ubulungi; Na avemyoyo milungi va la bu londa.

¹⁶Ibwaha u li singirira inze ku avadamano? Na ibwaha a la mwanira ku va kola ubudamano?

¹⁷Yahova na va na ta veye mukonyi wange, Mwoyo gwange nkano gwa menya mu likiring'ana.

¹⁸Lwa nda vola, Kirenge kyange ki tereranga; Tsimbabasi tsitsyo, O Yahova, tsya mbonnya.

¹⁹Ubunyingi bwetsiganagani tsyange mu inze Ubuleminyi bubwo bu sangalidzanga mwoyo gwange.

²⁰Intebe yobwami bwobudamano i nyala kuhambana nive? I longanga kivi kuli inzira yelilaga?

²¹Vevungidza halala kuvukira mwoyo gwomulungi Nokuvika mahyolo ku wamasahi ga ta li nekindu.

²²Navutswa Yahova a veye munara gwange mutambi, Na Nyasaye wange a veye lwanda lwange lwokuhonera mu.

²³Naye yirannyi kuvo ubudamano bwavo avene Na a va dividza mu ubudamano bwavo avene; Yahova Nyasaye wetu a la va twulidza ligali.