Read lulogooli Tsing'ano 12 Bible Online

Tsing'ano 12 - lulogooli bible

Tsing'ano 12

¹Ku vosi u yanzanga kweganehidzwa niye u yanzanga limanya; Navutswa uyu u dunyiranga lihe bwa amageli a veye kuli inyama.

²Mundu mulahi a la nyola tsimbabasi ku Yahova; Navutswa mundu wetsiganagani tsindamano a la kalagirwa.

³Mundu si a la singiridzwa nobudamano mba Navutswa kitinya kyomulungi si ki la dengeyidzwa.

⁴Mukali mulahi a veye itaji yomusatsa wewe; Navutswa uyu u mu letera tsisoni a veye kuli vigumba vya gunda vivye.

⁵Tsiganagani tsyomulungi tsi veye tsinungi; Navutsu a makuva gomudamano ga veye ubugadi.

⁶Makuva gavadamano ga veye mu ligoneka masahi; Navutswa munwa gwavalungi gu la va honnya.

⁷Avadamano va tung'aminyangwa, na si va veye ho; Navutswa inyumba yomulungi i la singira.

⁸Mundu a lidzominywa kuli kigero kyobugeeri bwibwe; Navutswa uyu womwoyo gwobukyamu a la legwa.

⁹Uyu u legangwa, naye na a veye nomutugwa wewe A veye mulahi kuvita uyu wiidzominya mwene, na a ta veye nevyokulia.

¹⁰Mundu mulungi a lindanga ubulamu bwemitugu gyigye; Navutswa tsimbabasi tsyomuda mano tsi veye ubululu.

¹¹Uyu u limanga mulimi gwigwe a la va nevyokulia vi duka; Navutswa uyu u londanga vandu va vutswa si a veye nelimanya.

¹²Avadamano va kayirangwa vilanye vya avandu avadamano. Navutswa kitinya kyavalungi kyamanga makuyu.

¹³Ku lihyolo lyeminwa, mutego gu veye mu, ku mudamano; Navutswa mulungi a la hona mu kivi.

¹⁴Ubulahi bu la duka ku mundu ku makuyu gomunwa gwigwe Na mundu a la hebwa likola lyamakono gege.

¹⁵Inzira yomusiru i veye inungi mu tsimoni tsitsye; Navutswa wobugeeri a huliridzanga makuva.

¹⁶Ubutima bwomusiru bwelang'aminya bwangu; Navutswa mundu wobugeeri a kunikanga tsisoni.

¹⁷Uyu u volanga ageligali a vuulanga ubulungi; Navutswa muloli wobubehi a volanga ubugadi.

¹⁸Ha veye welivola bugira liganagana, kuli litumita lyekivavi; Navutswa ululirni lwomugeeri lu veye nobulamu.

¹⁹Munwa gweligali gu la dinyiridzwa mihiga nemihiga; Navutswa ululimi lwobubehi lu veye lwedagika indala vutswa.

²⁰Ubugadi bu veye mu mwoyo gwa yavo ava ganagananga uhudamano; Navutswa ku yavo ava lungikidza mirembe, ubusangali bu veye kuvo.

²¹Avalungi si va la nyola kivi kali hakuzuzu: Navutswa avadamano va lizula ubudamano.

²²Minwa gyobubehi gyi veye livihiriridza ku Yahova; Navutswa yavo ava kolanga bulungi, nivo ava a yanzidzanga.

²³Mundu wobugeeri a visanga limanya; Navutswa mwoyo gwavasiru gu lang'aminya ubusiru.

²⁴Mukono gwa mugulu gu lameha; Navutswa mugata a la gererwa miyinzi gyigye.

²⁵Ubuliduhu mu mwoyo gwomundu bu gwinaminya; Navutswa likuva lilahi li gu sangalidza.

²⁶Mulungi a veye mwimiriri ku mutende wewe; Navutswa inzira yomudamano i va hilanga mu mahyolo.

²⁷Mugata si a samba kya a nyoye mu luhidzi lwilwe Navutswa vindu vilahi vyavandu vi veye vyomugulu.

²⁸Livamwoyo li veye ku inzira yobu lungi; Kandi si ha veye likudza mu inzira yalyo.