Read lulogooli Tsing'ano 15 Bible Online

Tsing'ano 15 - lulogooli bible

Tsing'ano 15

¹Litivula lyagalaha li kiring'annya ubutima; Navutswa makuva malulu ga viridzanga ubutima.

²Ululimi lwomugeeri lu volanga limanya lilungi; Navutswa munwa gwomusiru gu sundulanga ubusiru.

³Tsimoni tsya Yahova tsi veye hosi, A lolanga madamano na malahi.

⁴Ululimi luhooma lu veye musala gwelivamwoyo; Navutswa ubukyamu mulwo bu veye ubwoneku bwomwoyo.

⁵Musiru a leganga lihebwa amageli na dada wewe; Navutswa u bugiriranga lyegidzwa a nyolanga ubugeeri.

⁶Mu inyumba yomulungi mu veye na akiba inyingi; Navutswa mu limedeka lyavada mano mu veye nekivi.

⁷Minwa gyavalungi gyi gavulanga limanya; Navutswa mwoyo gwomusiru si gu kolanga ndiyo mba.

⁸Kihaanwa kyomudamano ki veye ubuvihiriridzi ku Yahova; Navutswa lisaala lyavalungi li veye ubuyanzi bwibwe.

⁹Inzira yavadamano i veye ubuvihiriridzi ku Yahova; Navutswa a yanza uyu u londananga nobulungi.

¹⁰Li veye ho lihebwa amageli lida mbidzanga uyu u lekanga inzira; Na uyu u dunyira ligondokirwa a la kudza.

¹¹Kihadisi na ubwoneku vi veye imbiri wa Yahova: Nasindi myoyo gyavana va avandu

¹²Wekihenyahenye si a yanza ligondokirwa; Si a li tsia ku avageeri.

¹³Mwoyo gwokusangala gu kola mumoni ubusangali; Navutswa liverera lyononnya mwoyo.

¹⁴Mwoyo gwa uyu u veye nobugeeri gwenyanga limanya; Navutswa munwa gwavasiru gu litsanga ubusiru.

¹⁵Madiku gosi ga yavo ava dambidzangwa ga veye madamano; Navutswa uyu u veye womwoyo gwelisangala a veye nelilia kazozo.

¹⁶Bukekeke halala nelitia Yahova, bu veye bulahi Kuvita butugi bunyingi halala nekivi.

¹⁷Lilia lyetsingutsa halala naliyanzana li veye lilahi Kuvita ing'ombe inkomeru halala nelidunyirana.

¹⁸Mundu mululu a viridzanga lihing'ana; Navutswa uyu mwikudziri wobutima a gayidzanga lihing'ana.

¹⁹Inzira yomugata i veye kuli ulwebo lwamafwa Navutswa inzira yomulungi i kolangwa lihasi.

²⁰Mwana wobugeeri a kolanga dada wobusangali; Navutswa mundu musiru a leganga mama wewe.

²¹Ubusiru bu veye ubusangali bwa uyu u ta li nobugeeri; Navutswa mundu welimanya a lungikidzanga ligenda lilye.

²²Ha lilungikidza li vula, lisaavirwa lyoneka; Navutswa lyenya li dinyiridzangwa ku bunyingi bwavalungi kidzi.

²³Mundu a vedzanga nobusangali mu litivula lyomunwa gwigwe; Na likuva li volangwa ku inyinga i dukani, li veye lilahi ndi

²⁴Ku avageeri inzira yelivamwoyo yanigiranga igulu, A twule mu Kihadisi hasi.

²⁵Yahova a liiha inyumba yowoluyai; Navutswa a la dinnya ulwako lwamukunzakali.

²⁶Tsiganagani tsindamano tsi veye livihiridza ku Yahova; Navutswa makuva ga yanzidzanga ga veye manifu.

²⁷Uyu u kayirwa vyambeti vi ta veye vilungi a dambidza inyumba yeye mwene; Navutswa uyu u vihirirangwa nevikukula a la va mwoyo

²⁸Mwoyo gwomulungi gu ganagananga agokutivula; Navutswa mwoyo gwomudamano gu sundulanga vindu vidamano.

²⁹Yahova a veye ihale ku mudamano; Navutswa a hulira lisaala lyomulungi.

³⁰Ubulavu bwetsimoni bu yanzidza mwoyo; Kandi makuva malahi ga komeridza vigumba.

³¹Ugutu gu huliranga lihebwa amageli gelivamwoyo Gu la menya hagati havageeri.

³²Uyu u sula lyegidzwa a leganga mwoyo gwigwe mwene; Navutswa uyu u hulira lihebwa amageli yenyolira limanya.

³³Litia Yahova li veye lyegidzwa lyobugeeri; Kandi lyegehidza limirira lidzo minywa.