Read lulogooli Tsing'ano 16 Bible Online

Tsing'ano 16 - lulogooli bible

Tsing'ano 16

¹Lilohidza lyomwoyo li vedzanga lyomundu; Navutswa litivula lyolulimi li twulanga ku Yahova.

²Tsinzira tsyosi tsyomundu tsi veye tsindahi imbiri wetsimoni tsitsye mwene; Navutswa Yahova a geranga myoyo ku tsiratili.

³U vike ku Yahova miyinzi gyigyo, Na tsiganagani tsitsyo tsi la dinyiridzwa.

⁴Yahova u koli vindu vyosi ku bulaliri bwibwe Yee, kali avadamano ku lidiku lyobudamano.

⁵Ku vosi u veye nomwoyo gwoluyai a veye livihiridza ku Yahova: Kali makono ni ga hambana si a la vula kukalagirwa.

⁶Ubudamano bwogidzangwa netsi mbabasi na ageligali; Avandu va twula ku ubudamano kigira litia Yahova.

⁷Tsinzira tsyomundu ni tsi yanzidza Yahova A kolanga kali avasigu veve kuva nemirembe kuye.

⁸Bukekeke halala nobulungi bu veye bulahi, Kuvita linyola linyingi halala nobukyamu.

⁹Mwoyo gwomundu gu ganagana inzira yeye; Navutswa Yahova yimiriranga ligenda lilye.

¹⁰Likalaga lilahi li vedzanga mu minwa gyomwami; Munwa gwigwe si gu la hyola mu likalaga.

¹¹Tsiratili na vigero vyobulungi ni vya Yahova; Na vyokugera vyosi vyomu imuya vi veye miyinzi gyigye.

¹²Likola ubudamano li veye livihiriridza ku avami; Kigira intebe yobwami i dinyiri dzangwa nobulungi.

¹³Minwa gyobulungi gyi veye ubuyanzi bwa avami; Navo va yanza uyu u volanga bulungi.

¹⁴Ubutima bwomwami bu veye kuli avatumwa velikudza: Navutswa mundu wobugeeri a la bu hodzeridza.

¹⁵Mu ubulavu bwommoni mwomwami mu veye nelivamwoyo; Na tsimbabasi tsitsye tsi veye kuli lilesi lyembula yenyima.

¹⁶Bu duka kuli ndi ubulahi bwokunyola ubugeeri kuvita kunyola ithahabu Yee, kunyola limanya li veye litovolwa kuvita linyola ifetha.

¹⁷Lihasi lyavalungi li veye kwavukana nobudamano: Uyu u lindanga inzira yeye yelindanga mwene.

¹⁸Uluyai lwimiriranga lidiva, Na mwoyo gwokwigingira gwimiriranga ligwa.

¹⁹Nobulahi kuva nomwoyo gwokwegehidza halala navadaka, Kuvita ligavula vilanye halala na avoluyai.

²⁰Uyu u huliranga likuva a la nyola ubulahi Na ku vosi u suuvira Yahova, a veye nobusangali.

²¹Avageeri mu mwoyo va la langwa avelimanya; Na ubunolu bweminwa bu medanga lyegidzwa.

²²Limanya li veye kidaho kyelivamwoyo ku uyu u veye nalyo; Navutswa lihebwa amageli ku avasiru li veye ubusiru bwavo.

²³Mwoyo gwomugeeri gwegidzanga munwa gwigwe, Nokumeda amegidzo mu minwa gyigye.

²⁴Makuva gokuyanzidza ga veye kuli lisang'asa lyobwuki, Ga veye amanolu ku mwoyo, na ubulamu ku vigumba.

²⁵I veye ho inzira i lolekanga ku mundu kuva inungi, Navutswa kiheri kyayo ki veye tsinzira tsyelikudza.

²⁶Inzala yomuyinziri i mu kolera miyinzi; Kigira munwa gwigwe gu mu niganga kugyo.

²⁷Mundu wa vutswa a senulanga ubudamano; Na mu minwa gyigye mu veye kuli muliru gu sambanga.

²⁸Mundu mukyamu a landidzanga lihing'ana; Kandi welimonya yavukannyanga avalina veligali.

²⁹Mundu mululu a goonyanga mu tende wewe, Nokumwimirira ku inzira i ta li indahi.

³⁰Uyu u mwolidzanga tsimoni tsitsye a kolanga kuganagana vikyamu: Uyu u sunnyanga minwa gyigye a kolanga vidamano.

³¹Mutwe gwetsimbudzi gu veye ne gudwa yobukumi; Ni gu va ni gu loleka ku inzira yobulungi.

³²Uyu mwikudziri ku butima a veye mulahi kuvita avaluviriri; Na uyu wamehanga mwoyo gwigwe a veye mulahi kuvita u vugulanga lidala.

³³Ikura i sikisangwa mu ingubo; Navutswa likalaga lyayo lyosi li veye ku Yahova.