Read lulogooli Tsing'ano 22 Bible Online

Tsing'ano 22 - lulogooli bible

Tsing'ano 22

¹Nobulahi kutovola lieta lilahi kuvita ubutugi bunyingi, Nokunyola tsimbabasi nobulahi kuvita ifetha na ithahabu.

²Avatugi na avadaka va vugana halala: Yahova a veye mulombi wavo

³Mundu weliva lyobugeeri a lolanga ubudamano, na yivisa; Navutswa ava ta li nelimanya va vitanga, na va salira mubwo.

⁴Madanyi gelyegehidza nokutia Yahova Ga veye ubutugi, na lidzominywa, na livamwoyo.

⁵Amafwa na mitego gyi veye ku inzira yavakyamu: Uyu welinda mwoyo gwigwe a la va ihale kuvo.

⁶Wegidze umwana ku inzira i mu dukira kugenda ku, Naye lwa a li va musakulu a la vula kugileka.

⁷Avatugi vameha ku avadaka; Na uyu u hambanga kivete a veye mutugwa womuhambidzi.

⁸Uyu u midza ubugutsa bwobudamano a la gesa ligesa lyobudivi; Na impimbo yobutima bwibwe i la hera.

⁹Uyu u veye nemoni yobuhaani a la gasidzwa; Kigira a haaniranga avadaka ubukima bwibwe

¹⁰U kunge wekihenyahenye, na lihing'ana li la twula; Yee, lihing'ana na tsisoni vi la hera.

¹¹Uyu u yanzanga ubunifu bwomwoyo Mwami a la va mulina wewe kigira tsimbabasi tsyeminwa gyigye.

¹²Tsimoni tsya Yahova tsi lindanga welimanya; Navutswa a tung'aminyanga makuva gomundu wobugadi.

¹³Mugata a vola, King'ang'a ki veye kyova: Inze ndiitirwa mu lihasi.

¹⁴Munwa gwavakali avageni gu veye ubogo bwoluliva: Uyu wa Yahova a dunyiranga a la gwa mu.

¹⁵Ubusiru bu boheywi mu mwoyo gwomwana; Navutsua impimbo yokumwegidza i la bu twulidza kuye.

¹⁶Uyu u dambidza avadaka kumeda vyambeti vivye Na uyu u hedzanga avatugi vindu, vombi halala va la daka.

¹⁷U tegidze ugutu, u hulire amakuva gavageeri, Na u vike mwoyo gugwo ku limanya lyange.

¹⁸Kigira ki veye kindu kilahi nu u va nu u ga vika mmwoyo gugwo Ni ga va ni sa dinyiridzwa halala mu minwa gyigyo.

¹⁹Lisuuviridza lilyo li ve mu Yahova, Inze nku mannyi lero vindu yivi, yee, ku ive.

²⁰Si nda ku ng'odera vindu vilahi Vya makuva na vyelimanya

²¹Kukumannya ubulungi bwamakuva gageligali U hilire avakutuma makuva gageligali?

²²U ta nuula mudaka, kigira a veye mudaka; Kandi u ta dambidza ava veye mu kivi ha kiribwa:

²³Kigira Yahova a la vanza likuva lyavo, Nokulanya livamwoyo lya yavo ava va lanya.

²⁴U ta kola ubulina nomundu umwangu ku ubutima; Na u ta genda halala nomundu u vihiririangwa bwangu:

²⁵Gase wega miima gyigye, Na mwoyo gugwo gu la hambwa mu mutego.

²⁶U ta va mulala kuvo ava hambannyanga makono, Kinga ku yavo ava veye vihambiriru vyamagovi.

²⁷Nu u va nu u ta veye nevyaduka kutunga, Kigira ki a la ku nyaga kitali kikyo isi wowo?

²⁸U ta twulidza kiloleru kyolwako lwa kale, Kya avaguga vovo va vika.

²⁹U lola mundu wobugulu mu miyinzi gyigye? A la singira imbiri wavami; Si a la singira imbiri wa avandu ava ta manyekana.