Read lulogooli Tsing'ano 24 Bible Online

Tsing'ano 24 - lulogooli bible

Tsing'ano 24

¹U ta kendekera avadamano; Kandi u ta kayirwa kugenda halala navo:

²Kigira mwoyo gwavo gu ganagana lidambidza Na minwa gyavo gyi volanga mahyolo.

³Inyumba yombakwa hobugeeri; Na i dinyeridzangwa nelimanya;

⁴Na vigo vyayo vizula limanya Nobutugi bwosi na vyobuguli budinyu.

⁵Mundu wobugeeri a veye netsingulu; Yee, mundu welimanya a medanga ubunyali.

⁶Kigira ku livolerana lyobugeeri u la kola ubulwani bubwo; Kandi mu bunyingi bwa valungikidzi mu veye neliguta.

⁷Ubugeeri bu veye igulu ligali ku musiru: Si a kunula munwa gwigwe mu kiribwa.

⁸Uyu u ganagananga kukola ubudamano, Avandu va la mu langa wamahyolo.

⁹Liganagana lyobusiru li veye ubwoni; Kandi wekihenyahenye, avandu va mu dunyira.

¹⁰Nu u va nu u kudza mwoyo mu lidiku lyekivi, Tsingulu tsitsyo tsi gehi.

¹¹U honnye yavo ava hilangwa mu likudza, Na yavo avenyanga kwiitwa, u va gayire.

¹²Nu u va nu u vola, Henza, si kwa manya yaga; Uyu u geranga myoyo ku iratili, si a lola likuva li veye yo yili? Na uyu u lindanga mwoyo gugwo, si a li manya? Naye si a la tunga mundu sa mulala kuli miyinzi gyigye?

¹³Mwana wange u lie bwuki, kigira bu veye buiahi; Na masang'usa gobwuki, ga veye manolu kutsatsama:

¹⁴Na ndiyo u la manya ubugeeri bu veye ku mwoyo gugwo; Nu u va nu u bu nyola, hene yaho madanyi ga la loleka, Na lisuuviridza lilyo si li la kalagwa.

¹⁵Ive mundu mudamano, u ta setera ubumenyo bwomulungi; U tononya busosero bwibwe:

¹⁶Kigira mulungi a gwidzanga hali katano na kaviri, na a vuka kandi; Navutswa lidiva li tung'aminya avadamano.

¹⁷U ta sangala lwa musigu wowo a gwa, Na mwoyo gugwo gu ta kola isango, lwa a tung'aminywa

¹⁸Gase Yahova a la iola gene yago, na ga la mu vihiriridza, Na a twulidza ubutima bwibwe kuye.

¹⁹Mwoyo gugwo gu ta ku samba kigira avadamano; Kandi u ta kendekera avobwoni:

²⁰Kigira avadamano si va li nyola kiheri kilahi mba; Na itaya yomudamano i la siminywa.

²¹Mwana wange, u tie Yahova na umwami; Na u ta hambana navo ava ho ngera kugirunkana:

²²Kigira lidiva lyavo li la va nyola bwangu; Kandi ni bwaha u manya ubwoneku bwa yavo vombi?

²³Yaga kandi na makuva gavageeri. Si bu li bulahi kuva nelyeridza ku avandu mu likalaga.

²⁴Uyu u volera mudamano, Ive u veye mulungi; Avandu va la mu laama, na avetsihiri va la mu dunyira:

²⁵Navutswa ubusangali bu la va ku yavo ava mu gondokera, Nobugasu bulahi bu la duka kuvo.

²⁶A busanga minwa, Uyu u twulidza mativuli malahi.

²⁷U lombe miyinzi gyigyo kyova, U gyi tegidze, gyi ku tegere mu mulimi; Na lwenyima wombake inyumba yoyo.

²⁸U ta va muloli ku mutende wowo bugira kivune; Na u ta gada neminwa gyigyo.

²⁹U ta vola, Na inze nda mu kolera kuli ya nkolera; Nda mu tunga kuli miyinzi gyigye.

³⁰Nda vita himbi nomulimi gwomugata, Himbi nomulimi gwemizabibu gwomundu u ta li nelimanya;

³¹Na henza, gwa li gwa mera amafwa gwosi, Gwosi gwa kunikwa nelitambadza Na lugaga lwagwo lwa magina lwa tsomwa hasi.

³²Hene yaho nda henza, ni nganagana ligali; Nda lola ni nyola amegidzo:

³³Ligona likekeke, na tsindolo tsinkekeke, Kwikumberera mu tsindolo hakekeke;

³⁴Na ndiyo ubudaka bubwo bu la duka kuli mwivi, Nobudaka bubwo bu la ku nyola kuli mundu weviki vyuma.