Read lulogooli Tsing'ano 27 Bible Online

Tsing'ano 27 - lulogooli bible

Tsing'ano 27

¹U te yiidzominya ku mugamba; Kigira si u manya inkuva yelidiku li nyala kuleta.

²Mundu wundi a kwidzominya, gu ta li munwa gugwo mwene; Kinga mugeni, na gyi ta li minwa gyigyo mwene.

³Ligina li veye liliduhu, na muyeke gu minanga; Navutswa ubutima bwomusiru bu veye buliduhu kuvita yivi vyombi.

⁴Ubutima bu veye bwobululu, na ubudunyi bu veye nelikaminya Navutswa ni bwaha u nyala kusi ngira imbiri wembodoka?

⁵Ligondokerwa lya habulavu li veye lilahi Kuvita ubuyanzi bu viseywi.

⁶Bukindukidzi bwomulina bu veye bwobusuuvirifu; Navutswa libusa lyomusigu li veye nobugadi.

⁷Mwoyo gwiguti gu vihirirangwa kali ubwuki Navutswa ku mwoyo gwenzala vindu vyosi vilulu vi veye vinolu.

⁸Kuli linyonyi li gendagendanga ihale ku inyumba yalyo Ni ndiyo a veye uyu u gendagendanga ihale ku bugono bwibwe.

⁹Amaguta na vyokufunya mwayu, vi yanzidzanga mwoyo; Ni ndiyo ubunolu bwomulina womundu, bu twula ku makuva gomwoyo

¹⁰Mulina wowo mwene, na mulina wa dada wowo, u ta va leka mba; Na u ta tsia ku inyumba yamwavo wowo ku lidiku lyekivi kikyo: Mutende u veye ahimbi a veye mulahi kuvita amwavo u veye ihale.

¹¹Mwana wange, u ve nobugeeri, u yanzidze mwoyo gwange, Nduke kutivulira uyu u nyeganga.

¹²Umundu weliganagana lilahi a lolanga ubudamano, na yivisa; Navutswa avasiru va vitanga na va nyola ubusaliri.

¹³Vugula ingubo ya uyu u veye wekihambiriru kyomugeni; U vugule kihambiriru ku uyu u kolera mukali mugeni kihambiriru.

¹⁴Uyu u gasidza mulina wewe nomwoyo munene, na a vuka mabwebwe, Ga la volwa kuye kuva lilaama.

¹⁵Litonyatonya mu lidiku lyembula inyingi Na mukali welihing'ana, yivi vi leng'ana.

¹⁶Uyu u gayanga mukali uyu a gayanga imbuudza; Na maguta gomukono mulungi gwigwe ga mu gadanga.

¹⁷Kivya ki hyagalanga kivya; Na ndiyo mundu yeganehidza mumoni mwomulina wewe.

¹⁸Ku vosi uyu u lindanga mukuyu a la lia makuyu gagwo; Na uyu u lindanga munene wewe a lidzominywa.

¹⁹Kuli mu amadzi mumoni mu lokkidzanga mumoni, Ni ndiyo mwoyo gwomundu gu lolekidzanga mwoyo gwomundu.

²⁰Kihadisi na Mung'ani si vi nyala kwiguta; Na ndiyo tsimoni tsyomundu si tsi nyala kwiguta mba.

²¹Ludavo lu veye lwefetha, na mahiga gethahabu; Na mundu a geridzwa nelidzominywa lilye.

²²Kali nu u swagira musiru mu kinu nomusala halala nobuswage bu swagangwa Halala na yaga ubusiru bwibwe si bu la twula kuye mba.

²³Weguluhidze kumanya liva lyevyayo vivyo, U henze ligali tsing'ombe tsitsyo:

²⁴Kigira ubutugi si bu veye bwemihiga nemihiga; Kandi itaji i nyala kuhindira ku makula gosi?

²⁵Ubulimu bwumu bu hilangwa, na ubulimu buvisi bwelolekidza, Na tsingutsa tsyomu vigulu tsi vungidzwa mu inyumba.

²⁶Avana vamagondi va veye voku kola tsingubo tsitsyo, Na tsimbuli tsi veye ubuguli bwomulimi;

²⁷Na ga la va ho maveere getsimbuli kuduka ive vyokulia, na vyokulia vya venyumba yoyo, Na vyokugavulira avakana vovo.