Read lulogooli Tsing'ano 29 Bible Online

Tsing'ano 29 - lulogooli bible

Tsing'ano 29

¹Uyu weligondokirwa linyingi naa dinyeridza ligoti lilye A lononnywa nonoho na si ba veye nobuhonnyi.

²Lwa avalungi va medeka, avandu va sangala; Navutswa lwa mundu mudamano yameha, avandu va kenya.

³Ku vosi uyu u yanza ubugeeri a yanzidza dada wewe; Navutswa uyu u hambananga navamalaya a gotidza ubutugi bwa dada wewe.

⁴Umwami a dinyiridza kivala nelikalaga lilye lilungi; Navutswa uyu wenyanga vikukula a tung'aminya kivala.

⁵Mundu widzominyanga wakye na makuva madoto A teganga mutego ku ligenda lilye.

⁶Mu lihyolo lyomudamano mu veye nomutego; Navutswa mulungi yimbanga na a sangala,.

⁷Mulungi a ganagana makuva ga avadaka; Mudamano si a veye nelimanya kugamanya.

⁸Avekihenyahenye va sambanga lidala; Navutswa avandu avobugeeri va kiring'annya ubutima.

⁹Mundu wobugeeri na a veye nelihing'ana nomusiru, Na a va na a vihirirwa naho na a va na a seka, si ha veye nobusosi.

¹⁰Avalumindi va dunyira mudukiru; Na mu makuva go mulungi, venyanga livamwoyo lilye.

¹¹Umusiru a volanga vyelivihiririrwa vivye vyosi; Navutswa mundu wobugeeri a ligalira nokulihodzeridza.

¹²Mwamehi na a hulira makuva gobubehi, Avatugwa veve vosi va veye avadamano.

¹³Mudaka na umudambidzi va vugana halala; Yahova niye u lavidzanga tsimoni tsyavo vombi.

¹⁴Umwami u kalaganga makuva gavadaka nobusuuvirifu, Intebe yeye yobwami i la singeridzwa mihiga nemihiga.

¹⁵Impimbo na lyegidza vi vikanga ubugeeri; Navutswa mwana wa lekwa kulonda tsinzira tsitsye, a la legannya mama wewe.

¹⁶Avadamano lwa va medeka, mahyolo ga medeka; Navutswa avalungi va la lola ligwa lyavo.

¹⁷U he mwana wowo amageli, naye a la ku sosidza; Yee, a la sangalidza mwoyo gugwo.

¹⁸Ha malola ga ta veye, avandu va tsia mu kirage; Navutswa uyu u gumiranga lilaga a veye nobusangali.

¹⁹Mutugwa si a la bugirira kwegidzwa namakuva; Kigira kali na a hulira si a la ga londa.

²⁰U lola mundu welikola bwangu bwangu ku makuva gege? Ha veye nelisuuviru ku musiru kuvita uyu.

²¹Uyu u leranga mutugwa wewe bulahi kutwula bwana buke Ku kiheri a la va naye kuva mwana wewe.

²²Mundu u vihirirangwa a vukidza nga lihing'ana, Na mundu wobutima wizuye amahyolo.

²³Uluyai lwomundu lu la mwikidza hasi; Navutswa uyu u veye nomwoyo gwokwegehidza, a lidzominywa.

²⁴U veye nelisanga nomwivi a dunyira mwoyo gwigwe mwene; A huliranga imisu, ma a vula kuvuula.

²⁵Litia mundu li letanga mutego; Navutswa ku vosi u suuvira Yahova a veye nemirembe.

²⁶Avanyingi venyanga ubulahi ku uyu wamehanga; Navutswa likalagirwa lyomundu li twula ku Yahova

²⁷Mundu mukyamu a veye livihiriridza ku avalungi; Na uyu u veye mulungi ku inzira a veye livihiriridza ku avadamano.