Read lulogooli Tsing'ano 3 Bible Online

Tsing'ano 3 - lulogooli bible

Tsing'ano 3

¹Mwana wange, u tivirira megidzo gange; Navutswa mwoyo gugwo gu gumire amalago gange:

²Kigira butambi bwamadiku na mihiga gyelivamwoyo, Na mirembe ga la ku medera.

³U ta bugirira tsimbabasi na ageligali kukuleka: U vi bohe mwigoti mumwo: U vi ng'ode ku kibao kyomwoyo gugwo:

⁴Na ndiyo u la nyola tsimbabasi na limanya lilahi Imbiri wetsimoni tsya Nyasaye netsyavandu.

⁵U suuvire Yahova nomwoyo gugwo gwosi, U ta yeka ku ubugeeri bubwo mwene:

⁶Mu tsinzira tsitsyo tsyosi u mu bugirire, Naye a la kwimirira ku tsinzira tsitsyo.

⁷U ta va wobugeeri mu tsimoni tsitsyo; U tie Yahova, wavukane nobudamano:

⁸Inkuva yiyi i la va ubulamu ku lulera lulwo, Nokuvika ubuhaali mu vigumba vivyo.

⁹U he Yahova lidzominywa nevi ndu vivyo, Nobuhya bwelimedeka lilyo lyosi:

¹⁰Na ndiyo videra vivyo vi lizula ubunyingi Na vyokumina mazabibu vi la senuka iwaini impya.

¹¹Mwana wange, u ta lega ligondoka lya Yahova; Kandi u ta lola ubuliduhu ku amageli gege:

¹²Kigira wa Yahova a yanza, a mu hedzanga amageli, Kali kuli dada a hedzanga mwana wa a yanza.

¹³A veye nobugasu mundu u nyolanga ubugeeri, Kandi mundu u nyolanga limanya.

¹⁴Kigira madanyi gabwo ga veye malahi kuvita madanyi gefetha, Na vyambeti vi nyoleka yimu vi veye vilahi kuvita ithahabu indahi.

¹⁵Bu veye bulahi kuvita magina makanyu gobuguli budinyu: Kandi ku vindu vyosi vya u kayirangwa si ha veye na kilala ki leng'ana nabwo.

¹⁶Ubutambi bwamadiku bu veye mmukono gwigwe mulungi; Na mu mukono gwigwe mmosi a veye nobutugi na lidzominywa.

¹⁷Tsinzira tsitsye tsi veye tsyokuyanzidza, Na tsinzira tsitsye tsyosi tsi veye tsyemirembe.

¹⁸A veye musala gwelivamwoyo ku vosi ava mu gumira: Kandi sa mulala u hambana naye a veye nobugasu.

¹⁹Yahova ya lomba mise gwelirova nobugeeri; Na ya singiridza ligulu nelimanya.

²⁰Ku limanya lilye ululiva lwavukanywa, Na malesi ga tonyatonya lime.

²¹Mwana wange, u ta leka yaga ga twule imbiri wetsimoni tsitsyo; U gumire ubugeeri budukiru na limanya:

²²Nivyo vi la va livamwoyo lyomwoyo gugwo, Nobulahi mwigoti mumwo.

²³Kunangwa u la genda ku inzira yoyo bugira ubutii, Na kirenge kikyo ki la vula kwikigitala.

²⁴Lwa u gona, si U la tia mba: Yee, u la gona, na tsindolo tsi la va tsinolu.

²⁵U ta tia ubutihidzi bwa nonoho, Kinga ubwoneku bwavadamano lwa bu duka:

²⁶Kigira Yahova a la va ubuluviriri bubwo, Na a la linda kirenge kikyo ki vule kugumirwa.

²⁷U timana ubulahi yavo ava ga dukiranga kuhebwa, Lwa mukono gugwo gu veye netsingulu kukola.

²⁸U ta volera mutende wowo, U tsie, ma udze kandi, Na nda ku ha mugamba; Navutswa kya yenyanga u veye nakyo himbi.

²⁹U ta ganagana ubudamano ku mutende wowo, Lwa a menyanga nemirembe halala nive.

³⁰U ta hing'ana nomundu bugira kivune, Naye na a vula kukukolera ubu damano.

³¹U ta kendekera mundu wekirage Kandi u ta tovola indala ku tsinzira tsitsye.

³²Kigira mukyamu a veye livirihidza ku Yahova; Navutswa aga viswa gege ga veye halala na avalungi.

³³Lilaama lya Yahova li veye ku inyumba yavadamano; Navutswa a gasidza limenya lyavalungi.

³⁴Ligali a la lega avalegi; Navutswa a hedzanga avegehidzi ubulahi.

³⁵Avobugeeri va la lia ubukumi kuva miyandu; Navutswa tsisoni tsi la va linenehidzwa lyavasiru.