Read lulogooli Tsing'ano 31 Bible Online

Tsing'ano 31 - lulogooli bible

Tsing'ano 31

¹Yaga na makuva gomwami Lemueli; ubutumwa bwa mama wewe ya mwegidza.

²Ni kindu ki, mwana wange? Kandi ni kindu ki, mwana weinda yange? Kandi ni kindu ki, mwana welila gana lyange?

³U ta ha avakali tsingulu tsitsyo, Kinga tsinzira tsitsyo ku yavo avononnya avami.

⁴Si ga dukira avami, O Lemueli, si ga dukira avami kunwa iwaini; Kandi si ga dukira avanene vekivala kuvola, Kyokunwa kilulu ki veye haliha?

⁵Gase va la nwa nokwivirira lilaga, Nokukyaminya likalagirwa lyomundu u veye mu kivi.

⁶Uyu a veye ahimbi kudiva, u mu he kyokunwa kilulu, Na uyu u veye nomwoyo mululu u mu he iwaini:

⁷A nwe, na yivirire ubudaka bwibwe, Na a vule kwidzulitsa kivi kikye kandi.

⁸U kunulire idimbidi munwa gugwo, Mu makuva ga yavo vosi ava lekwa veng'ine.

⁹U kunule munwa gugwo u kalage bulungi, U kalagire avadaka na avadambi, bulungi.

¹⁰Ibwaha u nyala kunyola mukali wobunyali bulahi? Kigira liduka lilye li vitanga ubudukanu bwa magina makanyu.

¹¹Mwoyo gwomusatsa wewe gu mu suuvira, Naye si a la vula kuva nelimedeka.

¹²Mukali wewe a mu kolera bulahi, si a mu kolera ubudamano mba Madiku gege gosi gelimenya lilye.

¹³Mukali uyu yenyanga ubwoya bwamagondi na ikatani Na a kola miyinzi namakono gege nomwoyo gwobuyanzi.

¹⁴A veye kuli ubwato bwelikirannya; A letanga vyokulia vivye kutwula ihale.

¹⁵Kandi a vukanga ni bu kikiri ubudiku, Na a hedza avandu venyumba yeye vyokulia, Na a hedza avakana vatugwa veve miyinzi gyavo.

¹⁶A ligula mulimi nokugugula; Na a taga mulimi gwamazabibu ku makuyu ga makono gege.

¹⁷Yebohanga kikenge kikye nobunyali Nokwevika tsingulu mu makono gege.

¹⁸A lolanga vyokukirannya vivye vi veye nevyambeti: Itaya yeye si i simanga ubudiku.

¹⁹A hilanga makono gege kugumira kyokunavira tsimbusi, Na vigalo vivye vi gumira kyokunavira tsingubo.

²⁰A nyiranga mukono gwigwe ku avadaka; Yee, a hilira makono gege kukonya avadambi.

²¹Si a veye nobutii ku avenyumba yeye kigira ubukindu bwelikonza; Kigira avenyumba yeye vosi va vikwa tsingubo tsinzakanyu.

²²Mwene welombeye vyokwihuma; Tsingubo tsitsye tsi veye ikatani indahi na kiforosadi.

²³Musatsa wewe a manyekana mu kiribwa, Lwa yikala navakulundu vekivala.

²⁴A lombanga tsingubo tsyekatani nokutsigulidza, Naye a hedzanga avakiranyi mi sipi.

²⁵Tsingulu na ubugoosi vi veye tsingubo tsitsye; Naye a sangalira inyinga yidzanga.

²⁶A kunulanga munwa gwigwe nobugeeri; Na lilaga lyevikolwa vilahi li veye ku lulimi lwilwe.

²⁷A henzanga ligali miima gya venyumba yeye, Na si a litsanga ubukima bwobu gata.

²⁸Avana veve va singira nokumutala u gasidzeywi; Musatsa wewe kandi a mwidzominya, nokuvola,

²⁹Avakana vanyingi va koli bulahi, Navutswa ive u va vita vosi.

³⁰Ubulahi bu gadanga, na ligondo li veye lyavutswa; Navulswa mukali u tidzanga Yahova, a lidzominywa.

³¹U he uyu ku makuyu ga makono gege; Na vikolwa vivye vi mwidzominye mu viribwa.