Read lulogooli Tsing'ano 4 Bible Online

Tsing'ano 4 - lulogooli bible

Tsing'ano 4

¹Avana vange, mu hulire lyegidza lvadada, Na mu tegidze amatu kunyola limanya:

²Kigira mmu hedzanga megidzo malahi; Mu ta leka megidzo gange.

³Kigira inze nda li mwana ku dada wange Nda li mwana mudoto na muyanze yeng'ine imbiri wetsimoni tsya mama wange.

⁴Naye ya nzegidza, na a mbolera: Mwoyo gugwo gu bugirire makuva gange; U gumire malago gange, na u ve mwoyo;

⁵Wenyolere ubugeeri, wenyolere limanya; U tivirira, kandi u ta girunkana kutwula ku makuva gomunwa gwange;

⁶U ta bu leka, nabwo bu la ku linda bulahi; U bu yanze, nabwo bu la ku linda.

⁷Ubugeeri bu veye kindu kinene kuvita vyosi; kunangwa wenyolere ubugeeri; Yee, halala na linyola lilyo lyosi, wenyolere limanya.

⁸U bu kuminye, nabwo bu la ku nenehidza; Bu la ku letera lidzominywa, lwa u hambana nabwo.

⁹Bu la vika ku mutwe gugwo igudwa yobulahi; Bu la ku ha itaji yobukumi.

¹⁰U hulire, O mwana wange, na u vugule livola lyange Na mihiga gyobuhindiri bubwo gyi la va minyingi.

¹¹Nkwegidzi inzira yobugeeri; Nkwimiriye ku tsinzira tsinungi.

¹²Lwa u tsitsanga imbiri, ligenda lilyo li la lungekidzwa; Nu u va nu u nyagula, si u likigi tala mba.

¹³U gumire lyegidzwa ligali; u ta li leka li tsie: U li gumire; kigira li veye livamwoyo lilyo.

¹⁴U tingira mu inzira yavadamano, Kandi u ta genda ku inzira yavandu avadamano.

¹⁵Weyahule kuyo, u ta vita himbi kuyo; U girunkane kutwula kuyo, u tsie ahandi.

¹⁶Kigira si va gona tsindolo, ni ga ta li va koli ubudamano; Na tsindolo tsyavo tsi twulidzwa kuvo, ni ga ta li vikigitalidza umundu.

¹⁷Kigira va litsanga vyokulia vyobudamano, Na va nwedzanga iwaini yekirage.

¹⁸Navutswa inzira yavalungi i fwanana nobulavu bu ng'ereng'ananga, Bu ng'ereng'ananga kuvita nokuvita, kuduka ku lidiku lidukiru.

¹⁹Inzira yomudamano i fwanananga nekisundi: Si va manya kya vikigitalidza.

²⁰Mwana wange, u hulire makuva gange; U tegidze ugutu gugwo kuhulira livola lyange.

²¹U ta leke ga twule imbiri wetsimoni tsitsyo; U ga linde hagati homwoyo gugwo.

²²Kigira yago ga veye livamwoyo lya yavo ava ga nyolanga, Na ubulamu mu mubiri gwavo gwosi.

²³U linde mwoyo gugwo netsingulu tsyosi Kigira vyosi vyelivamwoyo vi twula kugwo.

²⁴Munwa gwobukyamu, u gu vike ihale ku ive, Na minwa gyobukyamu u gyi vike ihale ku ive.

²⁵Tsimoni tsitsyo tsi henze imbiri bulungi, Na vigohe vivyo vi henze imbiri wowo bulungi.

²⁶U lungekidze inzira yevirenge vivyo, Na tsinzira tsitsyo tsyosi tsi dinyeridzwe.

²⁷U ta girunkana kutsia haluvega ku mukono mulungi kinga ku mukono mmosi: U twulidze kirenge kikyo ha budamano.