Read lulogooli Tsing'ano 9 Bible Online

Tsing'ano 9 - lulogooli bible

Tsing'ano 9

¹Ubugeeri yombaki inyumba U vadzi tsitiru tsitsye tsitano na tsiviri:

²Wiiti tsinyama tsitsye; u tsuka nnyi iwaini yeye; U lombi imeza yeye:

³U tumi avakana avatugwa veve U kupanga lwanga hadiguluku hanene helidala:

⁴Ku vosi uyu u veye musiru, a girunkane nokwingira hano; Na uyu u geheye limanya, a muvolera,

⁵Hambi, mu lie vyokulia vyange, Na mu nwe iwaini yiyi ya ntsukannyi.

⁶Mu leke ubusiru, na mu ve mwoyo; Na mu gende mu inzira yelima nya.

⁷Uyu wegidzanga wekihenyahenye, yenyolira mwene linyegwa; Na uyu u gondokira mudamano yenyolera mwene imbala.

⁸U ta gondokira wekihenyahenye gase a la ku dunyira: U gondokire wobugeeri, naye a la ku yanza.

⁹Wegidze wobugeeri, naye a la meda ubugeeri: Wegidze mulungi, naye a la meda lyega.

¹⁰Litia Yahova li veye litanga lyobugeeri; Na limanya lya Mutakatifu li veye lihuliridza.

¹¹Kigira ku inze, madiku gogo ga la medeka, Na mihiga gyelimenya lilyo gyi la medeka.

¹²Nu u va nu veye nobugeeri, u veye nobugeeri bubwo mwene; Nu u va nu u lega, ive mwene u la ginga lilega zana.

¹³Mukali musiru a veye weliyoga; A veye musiru, na si a manya kindu.

¹⁴Yikalanga ha kiliango kyenyumba yeye, Ku intebe hadiguluku helidala,

¹⁵A duke kulanga ava vitanga, Ava gendanga bulungi ku tsinzira tsyavo.

¹⁶Ku vosi u veye musiru a girunkane, yingire hano; Na ku uyu u ta li nelimanya, a mu volera,

¹⁷Amadzi agokwibwa, ga veye manolu, Na vyokulia vya makiriri vi yanzidzanga.

¹⁸Navutswa uyu si a manya avakudzu va veye ho; Na avageni veve va veye mu luliva lwa Kihadisi