Read lulogooli Lwimbu lwa Solomoni 2 Bible Online

Lwimbu lwa Solomoni 2 - lulogooli bible

Lwimbu lwa Solomoni 2

¹Inze mbeye kimuli kya Sharon, Mbeye ubulavidzu bwomwivona.

²Kuli ubulavidzu bu veye hagati ha mafwa, Ni ndiyo muyanze wange a veye hagati ha vakana.

³Kuli muchungwa gu veye mu misala gyommulitu, Ni ndiyo muyanze wange a veye mu vayai. Ndikala hasi mu kiriri kikye nobusangali bunene, Na makuyu gege ga nda tsatsama ga li amanolu ligali.

⁴Ya ndeta mu inyumba yokuliira mu lisavo, Nebendera yeye ya li ku inze ya li ubuyanzi.

⁵Mbike tsingulu namazabibu amu mu, u mbodzeridze nomuchungwa Kigira saliranga nobulwaye bwobuyanzi bu letanga.

⁶Mukono gwigwe mmosi gu veye isi womutwe gwange, Nomukono gwigwe mulungi gu mkumbereye.

⁷Nzisuhidza mwinye, O vakana va Yerusalemi Ku visusu noku tsimboongo tsyomigendanyama, Mu ta sagannya, kandi mu ta vukidza muyanze wange, Kuduka a yanza mwene.

⁸Gu veye mwoyo gwomuyanze wange henza, yadzanga, A tumatumanga mu vigulu, nokukina mu tugulu.

⁹Muyanze wange a veye kuli kisusu kinga imboongo isoleli: Henza, a singiranga inyima welidigi lyetu; A henzereranga mu madirisha; Yelolekidza mwene mu vibao vyomu madirisha.

¹⁰Munyanze wange ya vola, na ya mbolera, Vuka, muyanze wange, mulahi wange, ku tsie.

¹¹Kigira, henza, inyinga yobukindu i nti; Imbula i duki i viti

¹²Vimuli vi loleka ku lirova; Inyinga yelyimba lyamanyonyi i duki, Mwoyo gwelikuulu gu hulirangwa mu kivala kyetu;

¹³Mukuyu gwengidzanga makuyu gagwo magingi, Na mizabibu gyi lavidzanga; Gyi lusanga malusu gagyo. Vuka, muyanze wange, mulahi wange, ku tsie.

¹⁴O likuulu lyange, u veye mu tsimbwa tsyamagina, Mu lyevisa lyoku kisulungutu, Leka ndole mmoni mumwo, Leka mbulire mwoyo gugwo; Kigira mwoyo gugwo gu veye munolu, na mmoni mumwo mu veye mulahi.

¹⁵Ku gumire vinywere, vinywere vikekeke Vyononyanga milimi gyamazabibu; Kigira milimi gyetu gyemizabibu gyi lavidzi.

¹⁶Munyanze wange a veye wange, na inze ni wewe: Yayanga kyayo kikye kyamagondi mu bulavidzu.

¹⁷Kuduka lwa mbasu gu sima, na viriri vi vita, Wirane, muyanze wange, u ve kuli kisusu kinga imboongo isoleli Ku vigulu vya Betheri.