Read lulogooli Lwimbu lwa Solomoni 3 Bible Online

Lwimbu lwa Solomoni 3 - lulogooli bible

Lwimbu lwa Solomoni 3

¹Inyinga yobudiku ku kitali kyange Ndenya uyu womwoyo gwange gu yanza: Nda mwenya, navutswa si nda mu lola mba.

²Nda vola, nda vuka kalunu, ntsie kuvodonkana mu lidala Mu tsinzira tsyalyo, nommigidze migalamu, Nda mwenya uyu womwoyo gwange gu yanza; Nda mwenya, navutswa si nda mu nyola mba.

³Avalindi ava vodonkananga mu lidala va ndola; Wa nda teva, Mwa lola uyu womwoyo gwange gu yanza?

⁴Nda vita kutwula kuvo hakekeke, Ma nda mu lola uyu womwoyo gwange gu yanza: Nda mu gumira, si nda bugirira a tsie mba, Kuduka nda mala kumuvika mu inyumba ya mama wange, Mu inyumba ya uyu wa mbereka.

⁵Nzisuhidza mwinye avakana va Yerusalemi, Ku visusu noku tsimboongo tsyomigendanyama, Mu ta sagannya, kandi mu ta vukidza muyanze wange, Kuduka a yanza mwene.

⁶Ni bwaha wanegiranga kutwula mu kyangalangwi Kuli minara gyomwoki, Wa vakwa maguta gomwayu gwa manemane nekimuli, Halala nobusie bwevifunyanga mwayu vyosi vya mugulidzi?

⁷Henza, amalungu ga Solomoni; Avasatsa avetsingulu makumi gatano na lilala va ga kumbiridzi, Mu vetsingulu va Israeli.

⁸Yavo vosi ava tumekiranga kivavi, avasidza vobulwani; Sa mulala a veye nekivavi kikye ku kivadzwa kikye, Kigira litihidza lyobudiku.

⁹Mwami Solomoni yelombera ligari Lyemisala gya Lebanon.

¹⁰Ya lomba vigutu vyalyo nefetha, Bwikaliru bwalyo bwa li bweithahabu, na hokwikala ha li nekiforosadi, Na hagati halyo ha kunikwa nobuyanzi, Bwa twula ku avakana va Yerusalemi.

¹¹Mu twule, Mwinye avakana va Zioni, mu lole mwami Solomoni, Wevike itaji ya mama wewe ya mu vika Ku lidiku lvelikwa lilye, Ku lidiku yilye lyobusangali bwomwoyo gwigwe.