Read lulogooli Lwimbu lwa Solomoni 4 Bible Online

Lwimbu lwa Solomoni 4 - lulogooli bible

Lwimbu lwa Solomoni 4

¹Henza, ive u veye mulahi, mu yanze wange; henza, ive u veye mulahi; Tsimoni tsitsyo tsi veye kuli tsya makuulu mugongo wobwasasu bubwo. Lisu lilyo li veye kuli kyayo kyetsimbuli, Tsi lolekanga ku luvega lwekigulu kya Gileadi.

²Amino gogo ga veye kuli kyayo kyamagondi manyavuli, aga twulangi mu likalagwa ubwoya bwangu, Aganegira kutwula mu lisingwa, Aga veye sa lilala navana vamalongo, Si ha veye nelilala hagati hago lyomwana walyo ya kudza mba.

³Minwa gyigyo gyi veye kuli luvusi lwakanyu, Na munwa gugwo gu veye mulahi ligali; Na bweni bubwo bu veye kuli kidonye kyelikomamanga Imugongo wobwasasu bubwo.

⁴Ligoti lilyo li veye kuli kitaradzi kya Daudi Kyombakwa kuva ligungi lyevyuma vyobulwani, Hetsingavo elfu tsi sungangwa, Tsingavo tsyosi tsya vetsingulu.

⁵Tsimbeere tsitsyo tsyombi tsi veye kuli visusu visoleli, Vi veye visusu visoleli vivulwa malongo, Yayanga hagati ho bulavidzu.

⁶Kuduka mbasu gu sime, na viriri vi vite, Inze nda tsia kuduka ku kigulu kyamanemane, Nokuduka ku kagulu kekimuli.

⁷Ive muyanze wange, u veye mulahi ligali; Si ha veye nembala mu ivemba.

⁸Hamba halala ninze kutwula Lebanon, O mukana migima wange, Halala ninze kutwula Lebanon: Henza kutwula ku ntongi ya Amana, Kutwula ku ntongi ya Seniru na Herimon, Kutwula mu tsimbangaywa tsyeving'ang'a Kutwula mu vigulu vyetsingoi.

⁹Wa sangalidza ligali mwoyo gwange, mbotso wange, mukana mugima wange Wa sangalidza ligali mwoyo gwange nemoni yoyo indala, Nomunyolo mulala gweligoti lilyo.

¹⁰Ubuyanzi bubwo bu veye bulahi kuli ndi, mubotso wange, mukana mugima wange Ubuyanzi bubwo bu veye bulahi kuli ndi, kuvita iwaini Na muhomo gwamaguta gogo gu veye, mulahi kuli ndi, kuvita vifunyanga mwayu tsing'ano tsyosi

¹¹Minwa gyigyo, O mukana mugima wange, gyi tonyatonyanga kuli kemenye kyobwuki: Ubwuki namaveere vi veye isi wolulimi lulwo; Na malusu getsingubo tsitsyo ga veye kuli amalusu ga Lebanon.

¹²A veye mulimi gu hanwa, mubotso wange, mukana mugima wange; Kisenukiru kyamadzi ki galirwa, kidaho ki vikwa muhuri.

¹³Visibu vivyo vi veye kisulu kyamakomamanga gamakuyu gobuguli budinyu; Mugomati halala nemisala gya nardi,

¹⁴Inardi na mandano, Tsindago na mudalasini, halala nemisala gyosi gyekimuli; Manemane na subiri, halala nevifunyanga mwayu vilahi vyosi.

¹⁵U veye kisenukiru kyamadzi gommulimi Kidaho kyamadzi ge livamwoyo, Migera gya Lebanon gyi genda nga.

¹⁶Vuka, imbuudza ya kasikasini; hamba, imbuudza ya kusini; Huudza ku mulimi gwange, mwa yu gwagwo gu duke kuvuyidzwa kyova. Muyanze wange yingire mmulimi gwigwe, A lie amakuyu gage aga yanzidzanga.