Read lulogooli Lwimbu lwa Solomoni 5 Bible Online

Lwimbu lwa Solomoni 5 - lulogooli bible

Lwimbu lwa Solomoni 5

¹Mmali kwingira mmulimi gwange, mubotso wange, mukana mugima wange: Mmali kwagula manamane gange halala nevifunyanga mwayu vyange; Mmali kulia kemenye kyobwuki kyange halala nobwuki bwange; Mmali kunwa iwaini yange halala namaveere gange. Avalina vange, mu lie; Mu nwe, yee, mu nwe ligali, O vayanze vange.

²Nda li ni ng'onanga tsindolo, navu tswa mwoyo gwange gwa vuka: Mwoyo gwomuyanze wange yigu lihidzanga, na a vola, U nzigulire, mubotso wange, mu yanze wange, likuulu lyange, mudukiru wange; Kigira mutwe gwange gwizuye lime, Lisu lyange lizuye tsingerergeridza tsyamadzi gobudiku.

³Nnavuye ingubo yange; ndevika ndi kandi? Nsingi virenge vyange; nda vi vika ndi kandi mu mandu?

⁴Muyanze wange yingeridza mukono gwigwe mu mwanzu gwekiliango, Nomwoyo gwange gwa demadema kigira uyu.

⁵Nda vuka nduke kwigulira mu yanze wange; Na makono gange ga tonyatonya manemane, Na videte vyange vya tonyatonya manemane yamadzi, Ku bugimiriru bwomuluguyu.

⁶Ndigulira muyanze wange; Navutswa muyanze wange ya li na a vodonkana na a tsie. Mwoyo gwange gwa kudza mu inze lwa ya vola: Nda mwenya, navutswa si nda mu nyola mba; Nda mu langa, navutswa si ya bugirira mba.

⁷Avalindi ava vodonkanga mu lidala va ndola, Va nkuya, nokunzata tsingoma; A valindi vamadigi va nyaga yange inzasasu.

⁸Nzisuhidzanga mwinye avakana va Yerusalemi, Ni mu va ni mu nyola muyanze wange, Mu mu volera, Inze saliranga ubu lwaye bwobuyanzi bu letanga.

⁹Uyu wa u yanzanga a vitanga ndi wundi u yanzangwa, O ive u veye mulahi ligali mu vakana? Uyu wa u yanzanga a vitanga ndi wundi u yanzangwa Ive u luhi u duke kukwisuhidza ndi?

¹⁰Muyanze wange a veye mulavu kandi mwakanyu Niye munene mu tsielfu likumi.

¹¹Mutwe gwigwe gu veye kuli ithahabu i siyeku ligali Lisu lilye li veye litambi ligali nalyo li veye limwamu kuli lijikolo.

¹²Tsimoni tsitsye tsi veye kuli tsya makuulu ku tsintulu tsyemi gera gyamadzi; Tsya singwa namaveere, nokuvikwa kuli ga dukanga.

¹³Tsisaya tsitsye tsi veye kuli tsinkumbi tsyevifunyanga mwayu, Kuli hadiguluku ha mera vifunyanga mwayu: Minwa gyigye gyi veye kuli vila vidzu, vyokutonyatonya manemane yamadzi.

¹⁴Makono gege ga veye kuli tsimingiri tsyethahabu tsya handidzwa ku zumaradi: Mubiri gwigwe gu veye kuli lino lyenzogu lya handidzwa ku isafiru inyingi.

¹⁵Virenge vivye vi veye kuli vigutu vyamagina malavu, ga singeridzwa kuvyokusingeridza vyethahabu isiyeku: Ligondo lilye li veye kuli Lebanon, mulahi ligali kuli mitaragwa.

¹⁶Munwa gwigwe gu veye munolu ligali: Yee, a veye mulahi ligali hosi. Uyu a veye muyanze wange, uyu a veye mulina wange, Mwinye avakana va Yerusalemi.