Read lulogooli Lwimbu lwa Solomoni 8 Bible Online

Lwimbu lwa Solomoni 8 - lulogooli bible

Lwimbu lwa Solomoni 8

¹Nkano wa li kuli mbotso wange, Wa nuna tsimbeere tsya mama wange Lwa nku nyolanga kyova, nkano nku busa; Yee, si ha veye nomulala u nyala kundega.

²Nkano nda ka ku hila, nokukuvika mu inyumba ya mama wange, U duke kunzegidza; Nkano nda ka ku nwehidza iwaini ya vikwa mu vifunyanga mwayu, Ya madzi gelikomamamnga lyange.

³Mukono gwigwe mmosi nkano gwa ka va isi womutwe gwange, Na mukono gwigwe mulungi kunkumberera.

⁴Nzisuhidza mwinye, avakana va Yerusalemi Mu ta sagannya mba, kandi mu ta vukidza muyanze wange, Kuduka a yanza mwene.

⁵Ni bwaha uyu mukali wanegiranga kutwula mu kyangalangwi, Ni yesedemi ku muyanze wewe? Isi womuchungwa nda ku vukidza: Ha zana niho ha mama wowo ya lumirwa liluma lilyo Ni ho ha uyu wivula ive ya lumirwa.

⁶Mbika mu mwoyo gugwo kuli muhuri Kuli muhuri ku mukono gugwo: Kigira ubuyanzi bu veye netsingulu kuli likudza; Imbodoka i veye bululu kuli Kihadisi; Lumemo lwayo lu veye lumemo lwomuliru, Lumemo lwomuliru gwa Yahova ligali.

⁷Amadzi manyingi si ga nyala kusiminya ubuyanzi, Kandi lizulira lyamadzi si li nyala kubuhila: Mundu na a va ni ya haana ubutugi bwosi bwenyumba yeye a duke kunyola ubuyanzi Nkano wa legwa ligali.

⁸Kwinye ku veye namwavo wetu muke, Naye a kikiri kutwula tsimbeere: Ku la mu kolera ndi amwavo wetu muke Ku lidiku lya yenywa?

⁹Na a va na a veye lidigi, Ku lombaka kitaradzi kyefetha kuye: Na a va na a veye kiliango, Ku la mu kunika netsimbao tsyemitaragwa.

¹⁰Inze mbeye lidigi, netsimbeere tsyange tsi veye kuli vitaradzi vyalyo: Kunangwa nda li imbiri wetsimoni tsitsye kuli mulala wa nyole mirembe.

¹¹Solomoni ya li nomulimi gwemizabibu ha Baalhamon; Ya vika valindi vomulimi gwigwe zana gwamizabibu; Sa mulala, ku makuyu gagwo ya lagwa kuleta tsifetha elfu:

¹²Mulimi gwange gwemizabibu, gu veye gwange, gu veye imbiri wange: Ive, Solomoni, u la va netsielfu, Na yavo ava linda amakuyu gagwo va la va netsimia tsiviri.

¹³Ive u menyanga mmulimi Avakyo va tegidzanga amatu va duke kuhulira mwoyo gugwo: U nkole ngu hulire.

¹⁴U kole bwangu, muyanze wange, U ve kuli kisusu kinga kuli mboo ngo isoleli Ku vigulu vyevifunyanga mwayu.