Read lulogooli Isaya 1 Bible Online

Isaya 1 - lulogooli bible

Isaya 1

¹Yaga na malola ga Isaya mwana wa Amozu, ya lola ku makuva ga Yuda na Yerusalemi, mmadiku ga Uzia, na Jotham, na Ahazu, na Hezekia, avami va Vayuda.

²Mu hulire, O migulu, na u tegidze ugutu, O lirova: kigira Yahova u voye: Inze mmali kulageridza nokukulidza avana, navo vebaaye ku inze

³Ing'ombe i manyanga umwene yo, na isukiri i manyanga ligungi lyomwene yo; navutswa Israeli si a manyi mba, avandu vange si va ganagana mba.

⁴O ihiri yobwoni, avandu vedwika budamano, visukululwi vyavakoli vobudamano, avana ava kolanga agobwoneku va leki Yahova, va legi uyu Mutakatifu wa Israeli, veyahuye nokwirana inyima.

⁵Kigira ki mu kyenyanga likuywa kandi, kuduka kumeda bwebaali? Mutwe gwosi gu lwala, nomwoyo gwosi gu kudzi.

⁶Kutwula ku induvatiru kuduka ku mutwe si ha veye nobulamu mba; navutswa tsing'oma, nobukinduki, netsinkwagu: na vi vuli kubohererwa, na vi vuli kunazwa, na vi vuli kuvakwa namaguta.

⁷Kivala kyenyu ki veye king'anye; madala genyu ga sambeywi nomuliru; kivala kyenyu, avamenyi va ki lia imbiri wetsimoni tsyenyu, nakyo ki veye king'anye, kuli kya vamenyi va tung'aminya.

⁸Na mukana wa Zioni u lekeywi kuli kidioli mu mulimi gwamazabibu, kuli lidiri lyo kugona mmulimi gwamahondo, kuli lidala lya kumbiridzwa navasigu.

⁹Yahova wa mahe ni i va a vula kukulekera litigala likekeke ligali, nkano kwa ka va kuli Sodoma, nokufwanana na Gomora.

¹⁰Mu hulire likuva lya Yahova, mwinye avamehanga Sodoma; mu tegidze amatu, mu hulire malago ga Nyasaye wetu, mwinye avandu va Gomora.

¹¹Ubunyingi bwevihaanwa vyenyu ni kindu ki ku inze? Yahova a vola: nzizuye vihaanwa vyokusambwa vyamagondi makole, namaguta getsinyama tsinkomeru ligali; si nda yanza masahi getsigiriki, kinga gavana vamagondi, kinga age tsikole.

¹²Lwa mudza kuloleka imbiri wange, ni bwaha wenyanga inkuva yiyi mu makono genyu, kuduvaga mu mugidzi gwange?

¹³Mu ta leta kandi visyuviriru vya vutswa; kimuli ki sambwa ki veye kyokumbihiridza; kulonda mweli muhya, ne lisabato, nokuvugana, inze si nyala kubugirira ubudamano nelivugana lyelisalisa.

¹⁴Mwoyo gwange gu dunyiranga lilonda lyenyu lyomweli, na lilia lyenyu lya tovolwa; makuva yaga ga mminanga ligali; nduhi kuga ginga.

¹⁵Lwa mu nyira makono genyu, nda visa tsimoni tsyange mbule kumulola; yee, lwa mu saala lisaala linyingi, si nda li hulira mba; makono genyu gizuye masahi.

¹⁶Mweyogidze, mwetakase; mu twulidze ubudamano bwelikola lyenyu imbiri wetsimoni tsyange; mu leke kukola ubudamano;

¹⁷mwege ku kola bulahi; mwenye likalaga lilungi, mu konye uyu u dambidzangwa, mu kalagire avabisandu, mu vere vaku nzakali.

¹⁸Kalunu hambi, ku lombe makuva, Yahova a vola: kali ubwoni bwenyu ni bu va ni bu veye bwakanyu ligali, bu la va ubulavu ligali kuli likonza; ni bu va ni bu veye bwakanyu kuli kibaara bu la va kuli pamba

¹⁹Ni i va mu bugirira nokuhulira, mu la lia ubulahi bwekivala:

²⁰navutswa ni i va mu sula nokwebaala, kivavi ki la mu lia; kigira munwa gwa Yahova gu vola yaga.

²¹Ga li ndi lidala lisuuvirifu li gwiye liheyi lya li nelizuye likalaga lyobulungi ubulungi bwa li ni bu gonanga mulyo, navutswa kalunu avalumindi.

²²Ifetha yoyo i gwiye amandu gefetha vutswa, iwaini yoyo i tsukannyeywi amadzi.

²³Avanene vovo vebaaye, va veye avakye va avivi; sa mulala a yanza vikukula, nokulonda litungwa: si va kalagira avabisandu bulungi mba, kinga makuva ga vakunzakali si ga dukanga kuvo mba.

²⁴Kigira yaga Yahova a vola, uyu Yahova wa amahe, uyu Wanyala wa Israeli, O, inze ndeyahula ku yavo avasigu vange, nokuvanza kisalya kuvo ava hing'ana ninze;

²⁵nda girunkannya mukono gwange gu ve ku ive, na nda seredza ligali amandu gogo, nda twulidza lukakala lwosi lwa handa ku ifetha yoyo;

²⁶na ndi rannya avakalagi vovo kuli matsyambiri, na vavoli vovo kuli ma tsyambiri: na inyima wa yaga u la langwa Lidala lyobulungi, lidala lyo busuuvirifu.

²⁷Zioni li la bohololwa nelikalaga, na avirani valyo va la bohololwa nobulungi.

²⁸Navutswa ubwoneku bwa yava avamahyolo nobwa yavo avobwoni bu la va inyi nga indala, na yavo vosi ava leka Yahova va la hya.

²⁹Kigira va la va netsisoni kigira misala gya mwa suuviranga, na mu la leganywa kigira milimi gya mwa tovola.

³⁰Kigira mu la va kuli musala gwamatu gagwo ga niala, kuli mulimi gwa vula kusamwa.

³¹Navetsingulu va la va kuli livudze, nemiyinzi gyigye gyi la va kuli isese yomuliru; na vyombi vi laaka halala, na si ha la va na u nyala kuvisiminya.