Read lulogooli Isaya 13 Bible Online

Isaya 13 - lulogooli bible

Isaya 13

¹Ubuliduhu bwa Babuloni bwa Isaya mwana wa Amozu ya lola.

²Mwesingeridzire ibendera ku kigulu ki ta veye nemisala kinga ubulimu, mu hanzuke myoyo gyenyu, mu va sime nomukono, va duke kwingira mu viribwa vyavanene.

³Inze mali kulaga avandu vange avatakatifu, yee, nnangi avetsingulu vange kigira ubutima bwange, yava ava sangala mu bunene bwange.

⁴Liyoga lyavanyingi mu vigulu, kuli liyoga lyavandu vanene Liyoga lyomuliviti gwobwami bwetsihiri bwa vugana halala Yahova wa amahe ya vungidza amahe ku ubulwani zana.

⁵Va twula mu kivala kyehale, kutwula ku i kiheri kyegulu a veye Yahova, nevyuma vyobutima bwibwe, kudividza kivala kyosi.

⁶Mu kupe tsikwili; kigira lidiku lya Yahova li veye ahimbi; li ladza kuli ubudivi budzanga bu twulanga ku Uyu Wanyala Vyosi.

⁷Kigira yaga amakono gosi ga la va madediekere, nomwoyo gwomundu sa mulala gu la yengeka:

⁸na va la va nobutii: lilumwa nelisalira li la va gumira; va la kenya kuli mukali u veye mu lilumwa: na va la genyerana sa mulala nowakye; mumoni mwavo mu la va mumoni mwolumemo.

⁹Henza, lidiku lya Yahova lidzanga, li la va nobululu, halala nobutima nevihi rirwa vilulu; kukola kivala kuva hatswa, nokwononnya avobwoni ava kyo va twule ku.

¹⁰Kigira tsing'ering'ani tsyomigulu nelihambana lyatsyo si tsi laakidza ubulavu bwatsyo mba: neliuva li la kolwa kisundi mu livaala lyalyo, nomweli gu la vula kwaakidza ubulavu bwa gwo.

¹¹Na inze nda kalagira lirova yili kigira ubudamano bwalyo, nava damano nda va kalagira kigira ubu kyamu bwavo; na nda heridza luyai lwa yavo avekirage, noluyai lwa yavo avatihidzi nda lu tsoma hasi.

¹²Nda kola mundu kuva wobuguli budinyu kuvita ithahabu, nomundu a ve mu lahi ligali kuvita ithahabu indahi ya Ofiru.

¹³Kigira yaga nda degeridza ligulu, nelirova yili li la sung'uswa li twule ha li vedzanga, mu ubutima bwa Yahova mu amahe, mu lidiku lyobutima bwibwe bululu.

¹⁴Na ga la duka, kuli imboongo ihimangwa, na kuli magondi gavandu va vula kuvungidza, ni ndiyo va la girunkana mundu sa mulala kutsia ku avandu veve, na va liruka mundu sa mulala a tsie mkivala kikye.

¹⁵Sa mulala u li nyoleka a la todzwa; na sa mulala u li gumirwa a la gwa ku kivavi.

¹⁶Avana vadoto vavo va la donyanywa imbiri wetsimoni tsyavo; netsinyumba tsyavo tsi la lanywa, navakali vavo va lononnywa.

¹⁷Henza, nda vukidza Avamedi va tsie kuvo, ava li vula kuhenza ifetha, nomu makuva gethahabu, si va gi sangalira.

¹⁸Buta buavo bu la vunannya avasoleli; na si va la vererera lwivulu lwenda; tsimoni tsyavo tsi la vula kuvererera avana.

¹⁹Na Babuloni, ubukumi bwobwami, ubulahi bwoluyai lwa Vakalidei, bu la va kuli Sodoma na Gomora lwa Nyasaye ya va dividza.

²⁰Si bu la menywa ho navandu kandi, kandi si ha veye nomundu u menya mu ukutwula makula namakula: kandi Muarabu si a lombaka lihema lilye yo; kandi avayi si va la leka vyayo vyavo kugona yo mba.

²¹Navutswa tsinyama tsindulu tsyomwigendanyama nitsyo tsi li gona yo; netsinyumba tsyavo tsi lizula tsinyama tsyemyoyo gyokutihidza; maudo ga la menya yo, netsikole tsyombulimu tsi la kina yo.

²²Visalong'ongo vi la lokera mu tsimpinga tsyavo, nevibwe mu tsinyumba tsyavo tsyobukumi tsyokuyanzidza: netsinyinga tsyalyo tsi veye himbi kuduka, na madiku galyo si ga la medwa livalidzwa.