Read lulogooli Isaya 19 Bible Online

Isaya 19 - lulogooli bible

Isaya 19

¹Ubuliduhu bwa Egepeti. Henza, Yahova a ninanga ku lilesi li gendanga bwangu nokuduka Egepeti: nevifwananyi vyokusigami rwa vya Egepeti vi la dengeya imbiri wewe; nomwoyo gwa Egepeti gu la yenguka hagati hakyo.

²Na nda vukidza Avaegepeti kuhing'ana na Avaegepeti: na va la lwana sa mulala namwavo wewe, sa mulala na wakye; lidala nelidala, ubwami nobwami.

³Na roho gwa Egepeti gu la kudza hagati hakyo; na ndononnya makuva gakyo: va la tsia ku vifwananyi, noku vasegetiri noku vang'oli, noku va kumu.

⁴Na nda vika Avaegepeti mmukono gwomwami mululu; nomwami welitihidza a lameha kuvo, Yahova ya vola, Yahova wa mahe.

⁵Na amadzi ga twulanga mu inyanza ga la kama, na mugera gu la gota nokwuma.

⁶Na migera gyi la funya; visenukiru vyamadzi vya Egepeti vi la geha nokukama; kirago na lihunzu vi la niala.

⁷Na bunyasi bu veye ku intulu gwomu gera gwa Nili, ku luginga lwomugera gwa Nili, halala na vyosi vya tagwa ahimbi ku Nili vi la niala, nokutwulidzwa, si vi la va ho kandi mba.

⁸Na valuvi va la lira, na yavo vosi ava limbikanga mu mugera gwa Nili va la verera, na yavo avinikanga miluvu mu madzi va la geha tsingulu.

⁹Halala na yaga ava kolanga miyinzi gyokukupa katani, na yavo ava lu kanga tsingubo tsindavu, va la va tsisoni.

¹⁰Na tsitiru tsya Egepeti tsi la vunanywa; na yavo vosi va kola miyinzi gyokutungwa va la verera mu myoyo gyavo.

¹¹Avanene va Zoan va siruhala ligali; makuva ga vavoli va Farao avobugeeri ligali ga gwiye makuva getsinyama; mu volere ndi Farao, kuvola, Inze mbeye mwana wa yavo avobugeeri, mbeye mwana wavamr va kale ligali?

¹²Avobugeeri vovo va veye haliha? Va ku volere kalunu; na va manye ni inkuva ki ya Yahova wa mahe a saaviye ku Egepeti.

¹³Avanene va Zoan va gwiye avasiru, avanene va Nofu va gadeywi; va gotidzi Egepeti kutsia mu livoyavoya, ava li ligina lyolwiga lwetsihiri tsyakyo.

¹⁴Yahova u tsugannyi roho gwobukyamu hagati hakyo; na va gotidzi Egepeti mu miyinzi gyakyo gyosi, kuli muhambiki a yekayekanga mu liluka lilye.

¹⁵Egepeti si i la va nemiyinzi kali mulala, gyi nyala kukolwa nomutwe kinga mukira, kinga litu lyamakindu, kinga mmberam.

¹⁶Mu lidiku yilyo Avaegepeti va la fwanana navakali; na va la degera nokutia kigira lisung'usa lyomukono gwa Yahova wa mahe, gwa a sung'usanga kuvo.

¹⁷Na kivala kya Yuda ki la va litihidza ku Egepeti, mundu sa mulala u volerwa makuva gakyo a la tia, kigira lisaavira lya Yahova wa mahe, lya a saavira kukyo.

¹⁸Mu lidiku yilyo ga la va ho mu kivala kya Egepeti amadala gatano aga tumekira lulimi lwa Vakanani, nokwisuhira Yahova wa mahe; lidala lilala li la langwa Lidala lyobwoneku.

¹⁹Mu lidiku yilyo bu la va ho mu kivala kya Egepeti ubwali bwa Yahova, noku lwako lwakyo munara gu la va ho ku Yahova.

²⁰Na gu la va kilolekidzu nekyokumanyira gu vuula Yahova wa mahe mu kivala kya Egepeti; kigira va lanira Yahova ki gira yavo ava va dambidzanga, naye a la leta kuvo muhonnyi, nokuvasola, na a la va honnya.

²¹Na Yahova a la manyekana ku Egepeti, na Avaegepeti va la manya Yahova mu lidiku yilyo; yee, va la sigamira nokuhaana vihaanwa nevindu, na va la kola lilagana na Yahova, nokulikola.

²²Na Yahova a la kuya Egepeti, kukuya nokuhonnya; navo va lirana ku Yahova, naye a la bugirira lisaala lyavo, nokuvahonnya.

²³Mu lidiku yilyo lihasi li la va ho kutwula Egepeti kuduka Asuria, na Muasuria a lingira Egepeti, na Muegepeti a lingira Asuria; na Avaegepeti va la sigamira halala na Vaasuria.

²⁴Mu lidiku yilyo Israeli ki la va kya kavaka halala na Egepeti na Asuria, va la va vokugasidza hagati helirova;

²⁵kigira Yahova wa mahe u va gasidzi, na a vola, Va gasidzwe Egepeti avandu vange, na Asuria miyinzi gyamakono gange, na Israeli miyandu gyange.