Read lulogooli Isaya 21 Bible Online

Isaya 21 - lulogooli bible

Isaya 21

¹Ubuliduhu bwekyagalangwi kye nyanza. Kuli vihudzudzi vya Kusini vi vitanga hagati, bu twula mu kyangalangwi, nomu kivala kyelitihidza.

²Mmali kumannywa malola agokusaliridza; uyu u tumekiranga ubugadi a gadanga, na uyu u gotidzanga a gotidzanga. Yanegira, O Elam; u kumbiridze madala, O Media; mmali kuheridza likenya lyago lyosi.

³Kigira yaga kikenge kyange kizuye ubusaliri bunene; lilumwa li ng'umiye, kuli lihlmwa lyomukali u veye nelilumwa lyelivula: numangwa ligali kuduka si nyala kuhulira; ng'enyanga kuduka si nyala kulola.

⁴Mwoyo gwange gu herananga, litihidza li mbiki mu butii: inyinga ya bwiranga ya nyenyanga i girunkanyeywi kuva lidegera ku inze.

⁵Va lomba imeza, va vika ubulindi, va lia, va nwa: mu singire mwinye avanene, mu vake ingavo.

⁶Kigira Yahova ya mbolera likuva yili, Tsia, u vike umu lindi a henze; na aga a lola a vole:

⁷na lwa a lola kiduma ava nina ku tsiparasi, ava gendanga si vaviri kulala, kiduma kyetsisukiri, kiduma kyetsingamia, a la hulira ligali nokulinda ligali.

⁸Naye ya fwuma kuli king'ang'a, na a vola, O Yahova, nsingiye kazozo ku kitaradzi inyinga yombasu, na mbikiyi mu lilinda lyange ubudiku bei;

⁹na, henza, kiduma kyavandu kyadza, avanina ku tsiparasi, avagendanga si vaviri kulala. Naye ya tivula na a vola, Babuloni li gwiye, li gwiye; nevifwananyi vya vadzwa vya vanyasaye valyo vya vunanywa kuduka hasi.

¹⁰O ive wa inze nda huula, na u veye ubuswage bwo lodze lwange yaga ga mbulira ga twula ku Yahova wa mahe, Nyasaye wa Israeli, nzilwadzeye ive.

¹¹Ubuliduhu bwa Duma. Mundu mulala a langanga inze mu Seiru, na a vola, Mulindi, ni makuva ki agobudiku? Mulindi, ni makuva ki agobudiku?

¹²Na mulindi ya vola, Mugamba gudzanga, na kandi budiku: ni mwenya kuteva, mu teve: mu girunkane, mudze.

¹³Ubuliduhu ku Arabia. Mu la gona mu mulitu gwa Arabia, mwinye Vadedan, ava samula halala.

¹⁴Va leta amadzi ku uyu ya li nobuluhu; avamenyi mu kivala kya Tema va tsia kwagana yavo aviruka noku vahilira vyokulia.

¹⁵Kigira viruka vivavi, ku kivavi kya somolwa, nobuta bwa nyirwa, nobuliduhu bwo bulwani.

¹⁶Kigira Yahova ya mbolera ndi, Mu inyinga yomuhiga mulala, kuli livalidza lyemihiga gya uyu u tungangwa, ubukumi bwosi bwa Kedari bu la gota;

¹⁷na va li tigala mu livalidzwa lya yavo ava tumekira ubuta, avaluviriri vavana va Kedari, va la va vakekeke; kigira Yahova, Nyasaye wa Israeli, ya vola likuva yili.