Read lulogooli Isaya 25 Bible Online

Isaya 25 - lulogooli bible

Isaya 25

¹Yahova, ive u veye Nyasaye wange; nda ku kuminya, ndidzominya lieta lilyo; kigira wa kola vindu vyokugenya, vi veye makuva gogo ga kale, mu busuuvirifu nomu geligali.

²Kigira wa kola lidala kuva kitumi nelidala lyetsingulu kuva kyanyi, inyumba yobwami yavageni i vuli kuva lidala; li la vula kwombakwa kandi mihiga nemihiga.

³Kigira yaga avandu vetsingulu va la kuminya ive; Iidala lyetsihiri tsyelitihidza li la tia ive.

⁴Kigira ive wa li impinga yavadaka, impinga ku mudambi mu lidambidzwa lilye, yokwivisa mu inyinga yekihi, kiriri ku uluva, lwembuudza ya vatihidzi i luuma kuli kihi ki kupa lidigi.

⁵Kuli uluya mu ahumu u la gehidza ndiyo liyoga lyavageni; kuli uluya nekiriri kyelilesi, lwimbu lwavatihidzi lu likidzwa hasi.

⁶Kandi mu kigulu yiki Yahova wa mahe a la lombera avandu vosi lilia lyevinolu, lilia lyewaini halala na maseke gayo, lilia lyevinolu vizula buhali, lilia lyewaini ku maseke ya lombwa bulahi,

⁷Naye a lononnyira mu kigulu yiki mmoni mwekikuniko kya kunika avandu vosi, nekyokukinga kya kingwa ku tsihiri tsyosi.

⁸Naye u mali kumira likudza li vule kuva ho kandi mihiga nemihiga; Yahova Nyasaye a leya maliga mu mmoni mwosi; nelinyegwa lyavandu veve a la li twulidza mu lirova lyosi: kigira Yahova a vola yaga.

⁹Mu lidiku yilyo ga la volwa Henza, Uyu ni Nyasaye wetu; ku mu lindiriye, naye a la ku honnya: uyu ni Yahova; ku mu lindiriye, ku la lola bulahi nokusangalira ubuhonnyi bwibwe.

¹⁰Kigira mukono gwa Y ahova gu la sosera mu kigulu yiki; na Moabu a la duvagirwa hasi ha bugono hehe, kuli bunyasi bu duvagirangwa hasi mu madzi gesina.

¹¹Na a la nyira makono gege hagati halyo, kuli uyu welemanga a nyiranga makono gege kwelema; navutswa Yahova a likidza hasi luyai lwilwe halala neli kola lyamakono gege.

¹²Na lugaga lwempinga yamadigi gogo u mali ku lwikidza hasi, nokulwalira hasi, nokulutuula hasi, kuduka mu lugukyi.