Read lulogooli Isaya 26 Bible Online

Isaya 26 - lulogooli bible

Isaya 26

¹Mu lidiku yilyo lwimbu yilu lulimbwa mu kivala kya Yuda: Ku veye nelidala lyetsingulu, a la laga ubuhonnyi kuva madigi nempinga.

²Mwigule viribwa, ihiri yobulungi i lindanga geligali i duke kwingira.

³Ive u la mu linda a ve mu mirembe midukiru, wetsiganagani tsitsye tsya dinyeridzwa ku ive; kigira a suuviranga ku ive.

⁴Mu suuvire Yahova madiku gosi; kigira mu Mwami Yahova, Yahova mwene, mu veye nolwanda lwokumenya mihiga nemihiga.

⁵Kigira wikidzi hasi yavo ava menyanga igulu, lidala lyadiguluka: u likidzi hasi, u likidzi kuduka ku lirova; u li leti kuduka mu lugukyi.

⁶Kirenge ki la li duvagira hasi; kali virenge vyavadaka, netsinduvatiru tsyavadambi.

⁷Inzira yomulungi i veye bulungi: ive u veye mulungi u lungekidzanga inzira yomulungi.

⁸Yee, ku lindiriye ive, O Yahova mu inzira yelikalaga lilyo; likayirwa lyemyoyo gyetu li yeki ku lieta lilyo, nokulidzulitsa lilyo.

⁹Nkayirangwa ive nomwoyo gwange inyinga yobudiku; yee, nda kwenya mabwebwe na roho gwange gu veye mu inze; kigira likalaga lilyo lwa li veye mu lirova, avamenyanga mu lirova veganga ubulungi.

¹⁰Mudamano kali na a kolerwa tsimbabasi si a lyega ubulungi mba; mu kivaia kyobulungi uyu u la kola ubukyamu, na si a la lola ubukumi bwa Yahova.

¹¹Yahova, mukono gugwo gu gingeywi igulu, navutswa si va lola mba: navutswa netsisoni va la lola ubugulu bubwo ku avandu; yee, muliru gu la samba vasigu vovo.

¹²Yahova, ive u la laga mirembe ku kwinye; kigira ni ive wa ku kolera miyinzi gyetu gyosi.

¹³O Yahova Nyasaye wetu, avanene vandi va ta li ive, vamehi ku kwinye; navutswa ku ive weng'ine ku la tala lieta lilyo.

¹⁴Yavo va kudzi, si va la va mwoyo; va kudzi, si va la vuka kandi: kigira yaga ive wa duka kuvo nokuvononnya nelidzulitswa lyavo lyosi u mali kulidividza.

¹⁵Ive wa meda ihiri, O Yahova, wa meda ihiri; ive u kuminywa; wa nenehidza tsinzako tsyosi tsyekivala.

¹⁶Yahova, mu kivi kyavo vadza ku ive; va saala lisaala lwa wa va ha mageli.

¹⁷Kuli mukali u veye inda, yisundanga himbi ku inyinga yeye yokwivula, a vedzanga mu lilumwa nokulira ku busaliri bwibwe; ni ndivo kwa li imbiri wowo, O Yahova.

¹⁸Kwa li inda, kwa li nelilumwa, kwa li kuli kwivuye imbuudza; si kwa kola ubuhonnyi kali bulala mu lirova; kandi avamenyi mu lirova si va gwiye.

¹⁹Avakudzu vovo va la va mwoyo; mibiri mikudzu gyange gyi la vuka. Mu vuke, mwimbe, mwinye avamenyanga mu marova; kigira lime lilyo li veye kuli lime lyetsingutsa, na lirova li la twulidza avakudzu.

²⁰Hambi, mwinye avandu vange, wingire mu tsinyumba tsitsyo, u hane miliango gyigyo ku ive: wivise inyinga inkekeke, kuduka lwa kivi ki viti.

²¹Kigira, henza, Yahova a twulanga hango hehe a kalagire avamenyanga ku lirova kigira ubudamano bwavo: na lirova li la lang'aminya amasahi galyo, si li la kunika avandu valyo aviitwa mba.