Read lulogooli Isaya 29 Bible Online

Isaya 29 - lulogooli bible

Isaya 29

¹Budamano bu veye ku Arieli, v ku Arieli, lidala ha Daudi ya menya Meda muhiga ku muhiga; amalia ga vodonkane:

²hene yaho nda dambidza Arieli, na ha la va lisyoma nelilira; naye a la va ku inze kuli Arieli.

³Na nda singeridza mahema kukukumbiridza tsimbega tsyosi, na nda lwana nive mu impinga, na ndombaka lugaga kukukumbiridza.

⁴Na u likidzwa hasi, na u la vola kutwula mu marova, nelivola lilyo li la va isi mu lugukyi; nomwoyo gugwo gu la va kuli uyu a veye nomwoyo gwobusegetiri, kutwula mu marova, nelivola lilyo li la monyamonya kutwula mu lugukyi.

⁵Navutswa kiduma kyavasigu vovo ki la va kuli lugukyi, na kiduma kya yava avokutihidza ki la va kuli mukudzi gu bulukanga: yee, ga la va nonoho, bwangu.

⁶Yahova wa mahe a ladza kuye netsinkupa, noku degeridza kivala, neliyoga linyingi, nekihudzudzi, nekihi, nolumemo lwomuliru gu sambanga.

⁷Na bunyi ngi bwetsihiri tsyosi avalwana na Arieli, kuli vosi va lwana nalyo netsimpinga tsyalyo, nokulidambidza, va la va kuli liloto, malola gombudiku.

⁸Kandi ga la va kuli mundu u veye nenzala a lotanga maloto, na henza, a litsanga; navutswa lwa a vuka, mwoyo gwigwe gu veye vutswa: kinga kuli mundu wobuluhu a lotanga maloto, henza, a nwedzanga; ma a vuka, na henza, a kudza mwoyo, nomwoyo gwigwe gu veye nelyenya: ga la va ndiyo ku bunyingi bwetsihiri yitsyo tsyosi, ava lwana nekigulu kya Zioni.

⁹Mu lindirire mu genye; mwesangalidze mu ve avoboku: yavo va hambiki, navutswa si i veye iwaini; va yekayeka, navutswa si ga veye nelihambika.

¹⁰Kigira Yahova u tsuki ku mwinye roho gwetsindolo tsinene, na u vakulidzi tsimoni tsyenyu avaproieti; na mitwe gyenyu, avaioli, u gyi kuniki.

¹¹Na malola yaga gosi ga gwiye ku mwinye kuli makuva gekitabu kya vikwa muhuri, kyavandu va letera mundu welimanya ligali, ni va vola, Mwadza, u soma likuva yili: naye ya vola, Inze si nyala, kigira kya vikwa muhuri:

¹²ma kitabu yikyo ki leterwa uyu u ta li nelimanya, kuvola, Mwadza, soma likuva yili: naye a vola, Inze si mbeye nelimanya.

¹³Na Yahova ya vola, Kigira avandu yava visundi ku inze, na va nzidzominya nomunwa gwavo neminya gyavo, navutswa myoyo gyavo va gyi sundi ihale kutwula ku inze, nelitia lyavo lya va tidzanga inze li veye lilaga lyavandu lya vegidzwa:

¹⁴kunangwa kigira yaga, henza nda kola kandi miyinzi gyeligenya hagati ha avandu yava, miyinzi gyeligenya, likuva lyokugenya nokuhuga; nobugeeri bwavageeri vavo bu la gota, nelimanya lyavetsiganagani vavo li la viswa.

¹⁵Ubudamano bu ve kuvo avenyanga kuvisa makuva gavo ku Yahova mu luliva, nemiyinzi gyavo gyi veye mu kisundi, va volanga, Ni bwaha u ku lolanga? Ni bwaha u ku manya?

¹⁶Mwinye mu tung'ami nya makuva Umulongi a la validzwa kuleng'ana nobudohi; kuduka kindu kyalongwa ki vole ku uyu wa ki longa, Uyu si ya nomba mba; kinga kya longwa kuvola ku uyu wa ki longa kuvola, Si a veye nelimanya?

¹⁷I tigaye inyinga inkekeke vutswa, na Lebanon gu la girunkanywa kuva mulimi gwelyama ligali, nomulimi gwamanga gu la validzwa kuva mulitu?

¹⁸Kandi mu lidiku yilyo avahana amatu va la hulira makuva gekitabu yikyo, netsimoni tsya yavo avaboku tsi la lola mu kisisya nomu kisundi.

¹⁹Avahokya va la meda ubusangali bwavo mu Yahova, navadaka mu avandu va la sangala mu Uyu Mutakatifu wa Israeli.

²⁰Kigira mutihidzi u heridzeywi, nomulegi u heri, na vosi ava lindiriranga ubu damano va twulidzeywi;

²¹ava kolanga mundu kuva muhyoli mu likuva, nokutega uyu u haananga mageli ha kiribwa, nokugirunkannya wobulungi nekindu ki ta duka.

²²Kunangwa kigira yaga Yahova, uyu wa honnya Abrahamu, ya vola ku inyumba ya Yakobo: Yakobo si a la va isoni kalunu kandi mmoni mwimwe si mu la gaiula kalunu.

²³Navutswa lwa a lola avana veve, ava veye miyinzi gyamakono gange, ha gati hehe, va la takasa lieta lyange; yee, va la takasa Uyu Mutakatifu wa Yakobo, na va la tia Nyasaye wa Israeli.

²⁴Na yavo ava hyolanga mu myoyo gyavo va la nyola li manya, na yavo va monyanga va legidzwa megidzo.