Read lulogooli Isaya 31 Bible Online

Isaya 31 - lulogooli bible

Isaya 31

¹Ubudamano bu ve ku yavo ava sulunguta Egepeti kunyola likonywa ava suuvira tsiparasi na va suuvira magari gobulwani kigira ga veye manyingi, va suuvira avanina tsiparasi kigira va veye avetsingulu, navutswa va vula kuhenza ku Uyu Mutakatifu wa Israeli, kandi si venya Yahova

²Navutswa uyu kandi a veye nobugeeri, na a la leta ubudamano, na a la vula kwirannya makuva gege, navutswa a la singira kuhing'ana nenyumba ya yavo ava kolanga buda mano, nokuhing'ana nelikonywa lyayavo ava kolanga budamano.

³Avaegepeti va veye avandu, si va veye Nyasaye; netsiparasi tsyavo tsi veye tsinyama, si tsi veye roho: Yahova lwa a nyira mukono gwigwe, uyu u konyanga a likigitala, na uyu u konyangwa a la gwa, va la heridzwa vombi halala.

⁴Kigira Yahova a mbolera likuva yili, Kuli king'ang'a neking'ang'a kisoleli vi fwumanga ku lihima lyavyo, ni va langwa avayi vanyingi kutsia kukikuya, si ki la tia myoyo gyavo, kandi si ki legehidza ku luku lwavo: ga la va ndiyo Yahova wa mahe a la sulunguta ku kigulu kya Zioni kulwana, nomu kagulu kakyo.

⁵Kuli manyonyi ga bulukanga, ni ndiyo Yahova wa mahe a la linda Yerusalemi; a la li linda nokuliho nnya, a la vita kulyo nokulisola.

⁶Mu girunkane mu yeke ku uyu wa mu tinguhi ligali, O avana va Israeli.

⁷Kigira mu lidiku yilyo mundu sa mulala a la ta vifwananyi vivye vyefetha, nevifwananyi vivye vyetha habu, vya makono genyu ga lomba vi duke kuva ubwoni ku mwinye.

⁸Na Muasuria a la gwa ku kivavi, ki ta li kyomundu; nekivavi zana, ki ta li kyavandu, ki la mu mira; na a liruka kivavi yikyo, navasoleli veve va la nigwa ku ubusutu.

⁹Na lwanda lwilwe lu la twula kigira litihidzwa, navanene veve va la tihidzwa kigira ibendera, Yahova a vola, womuliru gwigwe gu veye mu Zioni, namahiga gege mu Yerusalemi.