Read lulogooli Isaya 33 Bible Online

Isaya 33 - lulogooli bible

Isaya 33

¹Ubudamano bu ve ku ive wononnyanga, na ive si wononnyangwa; wa tumekira ubugadi, navo si va ku kolera ubugadi Lwa u lekeye kwononnya, ive u lononnywa, kandi lwa u mala kutumekira ubugadi, navo va la ku kolera ubugadi.

²O Ya hova, u ku vera tsimbabasi; ku ku lindiriye: u ve mukono gwetu migamba gyosi, nobuhonnyi bwetu inyinga yekivi.

³Tsihiri tsyavandu tsi mali kwiruka kigira liyoga lyekivihiri; lwa weginga mwene tsihiri tsya salana.

⁴Vilanye vivyo vi la vungidzwa ha lala kuli lisa li vungidzanga: va la tu matuma kuvyo kuli tsisigi.

⁵Yahova a kuminywa; kigira a menyanga igulu: wizulitsa Zioni nelikalaga nobulungi.

⁶Tsinyinga tsitsyo tsi la va nelidinyeridza, ubuhonnyi bumyingi, nobu geeri, nelimanya: litia Yahova li veye butugi bwibwe bwakiba.

⁷Henza, avaluviriri vavo va kupanga uluku kyova; avatumwa avemi rembe va liranga nobululu.

⁸Mahasi ga lekeywi, si ha veye na u samulanga: wononnya lilagana, u legi madala, si a manya mundu.

⁹Kivala ki syoma nokudengeya; Lebanon ki nyoye tsisoni nokuniala; Sharon ki gwiye kuli migendanyama; na Bashan na Karimeli vi haluluki.

¹⁰Inze nda singira kalunu, Yahova a vola; kalunu ndeginga; kalunu nda kuminywa.

¹¹Mu la vereka mukudzi, mu livula luvuva; mwika gwenyu gu veye muliru gu la mu samba.

¹²Navandu va la va avahyu kuli choka, kuli amafwa ga temwa, ga sambangwa mmuliru.

¹³Mu hulire, mwinye ava mu veye ihale, ga nkoli; na mwinye ava veye ahimbi, mu bugirire ubunyali bwange.

¹⁴Avobwoni va veye mu Zioni va tiye; lidegera li va gumiye yavo ava vula kutia Nyasaye: Ni bwaha ku kwinye u nyala kumenya halala nomuliru gu sambanga? Ni bwaha ku kwinye u nyala kumenya halala nomuliru gu sambanga mihiga nemihiga?

¹⁵Uyu u gendanga mbulungi, nokuvola agobulungi; u leganga vyambeti vi nyolekanga ku lidambidza, uyu wuhanga makono gege ga vule kuvugula vikukula, u hananga amatu gege ga vule kuhulira ga masahi, nokumwolidza tsimoni tsitsye a vule kuhenza ubudamano:

¹⁶uyu a la menya igulu; hokuhonera hehe ha la va tsimpinga tsyomulwanda; a la hebwa vyokulia vivye; amadzi gege si ga la vula kuva ho.

¹⁷Tsimoni tsitsyo tsi la lola umwami mu bulahi bwibwe: tsi la lola kivala kyobugalamu bwakyo bwa duka ihale.

¹⁸Mwoyo gugwo gu la ganagana ku litihidza: A veye haliha uyu u validzanga? A veye haliha uyu u geranga ubushutu? A veye haliha uyu u validzanga vitaradze?

¹⁹Ive u la vula kulola avandu valulu, avamakuva gomululiva aga u ta nyala kumanya; avolulimi lugeni lwa u ta nyala kumanya.

²⁰Henza Zioni, lidala lyamalia getu: tsimoni tsitsyo tsi la lola Yerusalemi kuva ubu menyo bwobusosi, lihema li la vula kutwulidzwa, lyevivambo vyalyo vi la vula kwifwa, kandi migoye gyalyo si ha veye nomulala ugwa kalika.

²¹Navutswa Yahova a la va halala nekwinye mu ubukumi bwibwe, ha zana ha veye nemigera migalamu notugera, si gyi la va mu nobwato bwevivango, kali kilala, kandi si ha la va nobwato bunene.

²²Kigira Yahova a veye mukalagi wetu, Yahova a veye wa haana amalago wetu, Yahova a veye mwami wetu; a la ku honnya.

²³Migoye gyigyo gyi dengeye; si va nyala kudinye ridza mulage gweliato lyavo, si va nyala kutimbulula ingubo yeliato: hene yaho vilanye vyoluhidzi lunene vya gavulwa; valema va vugula vya lanywa.

²⁴Na uyu u menyanga yo si a la vola, mbeye mulwaye avandu va menyanga mu va la sarne fwa ubwoni bwavo.