Read lulogooli Isaya 35 Bible Online

Isaya 35 - lulogooli bible

Isaya 35

¹Ligendanyama nekivala kyumu vi la sangala; nekyangalangwi ki la sangala, na ki la lavidza ubulavidzu kuli kimuli.

²Ki la lavidza ubulavidzu bunyingi, ki la sangala kuduka litsantsalika nokwimba; ki la hebwa ubukumi bwa Lebanon, ubulahi bwa Karimeli na Sharon: va la lola ubukumi bwa Yahova, ubunene bwa Nyasaye wetu.

³Mu vike tsingulu ku makono madedekere, noku masigamo ga ta li netsingulu mu ga dinyeridze.

⁴Mu volere ava veye nomwoyo gwobutii, Mu ve avagulu, mu ta tia mba: henza, Nyasaye wenyu a ladza nekisalya, halala ne litunga lya Nyasaye; a ladza kumuhonya.

⁵Hene yaho tsimoni tsya vaboku tsi la kunulwa, namatu ga vahana amatu ga ligulwa.

⁶Hene yaho umuhenyeri a la tumatuma kuli imboongo, nolulimi lyedimbidi lu limba; kigira mmigendanyama madzi ga la senuka, notugera tu la senuka mu kyangalangwi.

⁷Na muyeke gweluhya gu la gwa lidavalia, namarova gobuluhu ga la gwa visenukiru vyamadzi; mu bumenyo bwevibwe, ha vi gonanga, ha la va nobunyasi halala nommberani, nelihunzu.

⁸Na ha zana ha la va lihasi, nenzira, na i la langwa Inzira yobutakatifu; ava ta li avanifu si va li genda kuyo; navutswa i la va ya yavo: avandu volugendo, kali ni va veye avasiru, si va li hyolera kuyo.

⁹King'ang'a ki la vula kuva ho, na tsinyama tsindulu tsi la vula kwanegira kuyo, tsi la vula kuloleka yo; navutswa avahonnywa va la genda yo:

¹⁰na avahonnywa va Yahova va lirana na va la duka Zioni, nokwimba; ubusangali bwemihiga ne mihiga bu la va ku mitwe gyavo: va la nyola ubusangali nobuyanzi, ubuvereri nelikenya vi la twulidzwa li'gali.