Read lulogooli Isaya 38 Bible Online

Isaya 38 - lulogooli bible

Isaya 38

¹Mmadiku yago Hezekia ya lwala kuduka ku likudza. Na Isaya muprofeti mwana wa Amozu ya tsia ku mwami, na a mu volera, Yahova a ku volera, U lohidze vindu vyosi vyenyumba yoyo; kigira u la kudza, si u la va mwoyo mba.

²Hene yaho Hezekia ya girunkana na a hendzidza mmoni mwimwe ku lidigi, na a saala Yahova,

³na a vola, O Yahova nku goonya, widzulire kalunu, kuli nda genda imbiri wowo mu geligali nomwoyo mudu kiru, na nda kola malahi imbiri wetsimoni tsitsyo. Hezekia ya lira ligali.

⁴Ma likuva lya Yahova lya duka ku Isaya, kuvola,

⁵Tsia ku Hezekia, u mu volere, Yahova Nyasaye wa Daudi guga wowo, a ku volera, Inze mbuliye lisaala lilyo, ndoli amaliga gogo: henza, nda ku meda ku madiku gogo mihiga likumi nagyitano.

⁶Na nda ku honnya nelidala yili ku mukono gwomwami wa Asuria; nda sola lidala yili.

⁷Na inkuva yiyi i la va kilolekidzu ku ive i twulanga ku Yahova, Yahova a la kola inkuva yiyi ya ya vola:

⁸henza, ndirannya kiriri mu vikaa, kiriri ki gendidzangwa neliuva hasi mu ligera lya Ahazu, kirane inyima kandi kuduka vikaa likumi. Ma liuva liranya vikaa likumi ku ligera lya lya mala kuyera.

⁹Henza mang'oda ga Hezekia mwami wa Yuda, lwa ya li mulwaye, na lwa ya hona bulwaye bwibwe.

¹⁰Nda vola, Ndingira mu viribwa vye Kilindwa mu madiku gange hagati: Nnuleywi litigala lyemihiga gyange.

¹¹Nda vola, Si nda lola Yahova, Yahova mu kivala kya va veye mwoyo: Si nda lola mundu kandi halala na avamenyanga mu lirova.

¹²Limenya lyange li twulidzeywi, li hileywi li twule ku inze kuli kidioli kyomwayi: Ningi livamwoyo lyange, kuli uyu u lukanga tsingubo; a la nkalaga ntwule ku kyokuluka kikye: Kutwula mbasu kuduka ubudiku u la mmaliridza.

¹³Ndekiring'annya kuduka mugamba; kuli king'ang'a, ni ndiyo a vunannyanga vigumba vyange vyosi: Kutwula mbasu kuduka ubudiku u la mmaliridza.

¹⁴Kuli litonderidzi kinga iminyi, ni ndiyo nda yovoya; Nda syoma kuli likulu, tsimoni tsyange tsi lutsiririra ku lihenza igulu: O Yahova, inze ndambidzangwa, u ve kihambiriru kyange.

¹⁵Mbola ki? Ya mboleye, kandi na mwene u ga koli: Inze nda genda galaha mihiga gyange gyosi kigira ubululu bwomwoyo gwange.

¹⁶O Yahova, ku vindu yivi avandu va veye mwoyo; Na livamwoyo lya roho gwange li veye mu vindu yivi ligali: Kigira yaga u mbonnye, u nkole mbe mwoyo.

¹⁷Henza, nda li nelitsunwa lilulu, kigira mirembe gyange: Navutswa ive mu liyanza mwoyo gwange u mbonnyi mu bogo bwobwoneku; Kigira u teye ubwoni bwange bwosi inyima wowo.

¹⁸Kigira Kilindwa si ki nyala kukwidzominya mba, likudza si li nyala kukwidzulitsa: Yava avikanga mbogo si va nyala kusuuvira ku geligali gogo.

¹⁹Welivamwoyo, welivamwoyo a la kwidzominya, kuli nkolanga lero: Avadada va legidza avana geligali gogo.

²⁰Yahova yetegeki kuhonnya inze; Kunangwa kigira yaga kwinye kulimba tsinyimbu tsyange nobukana bwemigoye Madiku gosi gelivamwoyo lyetu mu inyumba ya Yahova.

²¹Ma Isaya ya vola, Va vugule lihumbi lyamakuyu va li handidze kuli lunyasi ku livimba, naye a la hona.

²²Na Hezekia ya vola kandi, Ni kilolekidzu ki, ki limbuulira ndanegira mu inyumba ya Yahova?