Read lulogooli Isaya 39 Bible Online

Isaya 39 - lulogooli bible

Isaya 39

¹A Inyinga yeyo Merodaki-bala dan, mwana wa Baladan, mwami wa Babuloni, ya hilira Hezekia tsibaruwa nekihaanwa; kigira ya hulira ya lwala, na u sosi.

²Na Hezekia ya sangala ku vatumwa yavo, na ya va mannya ubutugi bwevindu vivye vyobuguli budinyu, ifetha, nethahabu, na vi funyanga mwayu, na maguta gobuguli budinyu, nenyumba yosi yevyuma vivye, na vyosi vi loleka mu butugi bwibwe: si ha li nekindu mu inyumba yeye, kinga mu bwami bwibwe bwosi, kya Hezekia ya vula kuvamannya.

³Hene yaho Isaya muprofeti ya tsia ku mwami Hezekia, na a mu teva, Avandu yavo va vola ki? Na va duki ku ive kutwula haliha? Hezekia ya vola, Va duki ku inze kutwula mkivala kyehale, kivala kya Babuloni.

⁴Ma Isaya ya mu teva, Va loli kindi ki mu inyumba yoyo? Na Hezekia ya tivula, Va loli vindu vyosi vi veye mu inyumba yange: si ha veye nekindu kali kilala mu butugi bwange bwakiba kya mbuli kuvamannya.

⁵Ma Isaya ya volera Hezekia, Hulira likuva lya Yahova wa mahe:

⁶Henza, madiku gadzanga, mmadiku yago ku vindu vyosi vi veye mu inyumba yoyo, na vya vaguga vovo va vika akiba kuduka lero, vyosi vi la hilwa Babuloni: si ha veye nekindu ki li tigala, Yahova a vola.

⁷Nomu vayai vovo va u livula, ava li twula ku ive, va la va hila; navo va la va vitsiri mu inyumba yobwami yomwami wa Babuloni.

⁸Ma Hezekia ya volera Isaya, Li veye likuva lilahi lya Yahova lya ive u voye. Na ya meda na a mu volera, Kigira mirembe gyi la va ho na geligali mu madiku gange.