Read lulogooli Isaya 40 Bible Online

Isaya 40 - lulogooli bible

Isaya 40

¹Mu leminye myoyo, mu leminye myoyo gyavandu vange, Nyasaye wenyu a vola.

²Mu volere Yerusalemi agokuleminya; mu hanzuke kulyo, mu vole, ubulwani bwalyo bu heri, mahyolo gege ga sameheywi, u vuguye mu mukono gwa Yahova hali kaviri kigira ubwoni bwibwe bwosi.

³Mwoyo gwomulala u hanzuka, na a vola, Mu lombe migendanyama inzira ya Yahova; mu lungekidze mu kyangalangwi lihasi lya Nyasaye wetu.

⁴Mavona gosi ga la digululwa na vigulu vyosi notugulu twosi vi likidzwa; na ha kyama ha la lungekidzwa, na magiki ga la leng'anywa:

⁵nobukumi bwa Yahova bu la lang'aminywa, na vomubiri vosi halala va la bu lola: kigira munwa gwa Yahova gwa vola yaga.

⁶Mwoyo gwomulala u volanga, Hanzuka. Kandi wundi ya teva, Mbanzukira ki? U vole, Vyemibiri vyosi vi veye bunyasi, nobulahi bwavyo bwosi bu veye kuli vimuli vyommulimi.

⁷Bunyasi bu nialanga, nekimuli ki kamanga, kigira mwika gwa Yahova gwa heera kuvyo; ligali avandu va veye bunyasi.

⁸Bunyasi bu nialanga, nekimuli ki kamanga; navutswa likuva lya Nyasaye wetu li la singira mihiga nemihiga.

⁹O ive wilwadziranga Zioni makuva malahi, yanegira mkigulu kitambi: O ive wilwadziranga Yerusalemi makuva malahi, u ginge mwoyo gugwo netsingulu; u gu ginge u ta tia mba; u volere madala ga Yuda Henza Nyasaye wenyu.

¹⁰Henza, Mwami Nyasaye a ladza kuli Wanyala, na mukono gwigwe gu leyamehira mwene: Henza, madanyi gege a veye nago halala, na litunga lilye li veye imbiri wewe.

¹¹A laya kyayo kikye kuli mwayi, a la gumira avana vamagondi mmukono gwigwe, na a la va ginga ku kiritu kikye, na va nunanga a la vendereridza.

¹²Ni bwaha u geri amadzi ku luhe lwomukono gwigwe, nokugera ligulu neligera lyokutwula ku kidete kinene kuduka kyanyasi, nokumanya liduka lyolugukyi lwelirova mu kigero, nokugera vigulu ku tsiratili, notugulu ku tsiratili tsyokusung'anana?

¹³Ni bwaha wimiriranga Roho wa Yahova, kinga kumwegidza kuli a veve mboli wewe?

¹⁴Yenya likuva lya bwaha, ni bwaha wa mwegidza, nokumwegidza mu inzira yelikalaga, nokumwegidza ubugeeri, nokumwegidza inzira yelimanya?

¹⁵Henza, tsihiri tsi veye kuli ingerageridza yamadzi mu isiongo, na tsi validzangwa kuva kuli akagukyi ka huudzangwa ku tsiratili: henza, a ginganga visulu kuli akandu vutswa.

¹⁶Na Lebanon si gu veye nobudukiru ku muliru, netsinyama tsyagwo tsyosi si tsi duki kuva kihaanwa kyokusambwa.

¹⁷Tsihiri tsyosi imbiri wewe tsi veye kuli kindu kya vutswa; na tsi validzeywi kuye tsi vule kuduka kuva kindu, kandi mwika vutswa.

¹⁸Kunangwa Nyasaye uyu mu la mu leng'annya na bwaha? Kinga mu la mu fwanannya nolugano ki?

¹⁹Ki fwananyi kya vadzwa, umusidza a ki salulanga, nomutuuli wethahabu ya ki kunika ithahabu, na a ki tuulira minyoro gyefetha.

²⁰U veye mudaka kuduka a ta nyala kunyola kihaanwa kuli yikyo a tovola umusala gu vula kugunda; nokunyola musidza ligali kusingeridza kifwananyi kya vadzwa, ki la vula kudengeya.

²¹Mu kikiri kumanya? Mu kikiri kuhulira? Si mwa volerwa kutwula mu litanga? Mu kikiri kumanya kutwula lirova yili lya temwa muse?

²²Niye wikalanga ku ingida yelirova, na avamenyanga mulyo va veye kuli visilili; uyu u vagalanga ligulu kuli ingubo yokukinga, nokulivambula kuli lihema lyokumenya mu;

²³u kolanga avanene kuva vutswa, na avakalagi velirova, a va kolanga mwika vutswa.

²⁴Yee, va vula kusimikwa; yee, va vula kumidzwa; yee, kitinya kyavo si ki hili imiri hasi: halala na yaga a va herera mwika, navo va nialanga, nekihudzudzi ki va twulidzanga kuli luvuva.

²⁵Kunangwa mu la fwanannya na bwaha inze, nduke kuleng'ana nave? Mutakatifu a vola.

²⁶Mu ginge tsimoni tsyenyu mu henze igulu, mu lole ni bwaha wa vi lomba, uyu u letanga lihe lyavo nelivalidza; a langanga lyosi ameta gavo; nobunene bwobunyali bwibwe, kandi kigira a veye wanyala mu tsingulu, si ha veye nekilala ki vula kuva ho.

²⁷Kigira ki, O Yakobo, u vola, na ive Israeli u vola, Inzira yange i viswa ku Yahova, nelikalaga lya ndukana nalyo lya vita kutwula ku Nyasaye wange?

²⁸U kikiri kumanya? U kikiri kuhulira? Nyasaye wemihiga nemihiga, Yahova, Mulombi wetsintulu tsyelirova, si a kudzanga mwoyo, kandi si a luhanga; limanya lilye si liderangwa.

²⁹A haana tsingulu ku va kudzanga myoyo; na a medanga bunyali ku uyu u ta li netsingulu.

³⁰Kali avayai va la kudza myoyo, nokuluha, navasoleli va la gwa ligali:

³¹Navutswa yava ava lindiranga Yahova va lirannya ubuhya bwetsingulu tsyavo; va lanegira igulu netsimbaha kuli kihungu; va la nyagula bugira kuluha; va la genda na si va la kudza myoyo mba.