Read lulogooli Isaya 41 Bible Online

Isaya 41 - lulogooli bible

Isaya 41

¹Mu kiring'ane imbiri wange, O visulu; mu leke avandu virannye ubuhya bwetsingulu tsyavo: vesunde himbi; ma va vole; ku lindirire himbi kwosi halala ku likalaga.

²Ni bwaha ya vukidza mulala kutwula ivugwe, wa a langanga nobulungi ha virenge vivye?A lete tsihiri imbiri wewe, nokumwamehidza ku avami; a va kola kuva kuli lugukyi ku kivavi kikye, kuli luvuva lu hilangwa va duke ku buta bwibwe.

³A va londerera, nokutsia nemire mbe, kali ku inzira ya a kikiri kugenda ku nevirenge vivye.

⁴Ni bwaha wa kola nokulomba inkuva yiyi, u langanga visukululwi kutwula mu litanga? Inze, Yahova, welitanga, nowekiheri, inze niye.

⁵Visulu vi loli, nokutia; tsindulu tsyelirova tsi degera; tsi sunda himbi, nokuduka.

⁶Va konyana mundu sa mulala na wakye; mundu sa mulala a volera amwavo wewe, U leme mwoyo.

⁷Ma muvadzi a tsuva umutuuli wethahabu, na uyu wemiyinzi gyigye gyi veye kunihidza nenyundu a tsuva umwungi, na a vola ku makuva gekyongu kyobuduha, Ki veye kyongu kilahi; na a ki boha nemisumali, gyi vule kudendeya.

⁸Navutswa ive, Israeli, mutumekiri wange, Yakobo wa ntovoye kisukululwi kya Abrahamu mulina wange,

⁹ive wa ng'umiye kutwulaku tsindulu tsyelirova, nokukulanga kutwula ku tsikona tsyalyo nokukuvolera, Ive u veye mutumekiri wange inze nku tovoye na si nku syuvi mba,

¹⁰u ta tia mba, kigira mbeye halala na ive; u ta genya mba, kigira mbeye Nyasaye wowo; nda ku vika tsingulu; yee, nda ku konya; yee, nda ku gu mira nomukono mulungi gwobulungi bwange.

¹¹Henza, yavo vosi va dunyira ive va la va isoni nokugenya: yavo va hing'ananga nive va la va avavutswa, nokudiva.

¹²U la ve nya, na u la vula kuvalola, kali yavo ava hangalana nive: ava lwananga nive va la va avavutswa, kuli kindu kya vutswa.

¹³Kigira inze, Yahova Nyasaye wowo, nda ku gumira mu kono gugwo mulungi, nokukuvolera, U ta tia mba; nda ku konya.

¹⁴U ta tia mba, ive ing'ende Yakobo, na mwinye avandu va Israeli; nda ku konya, Yahova a vola, na Muhonnyi wowo ni uyu Mutakatifu wa Israeli.

¹⁵Henza nku koli u ve kiju kihya kyokuhuuiira ubuswage, ki veye na amino; na u la huula vigulu, nokuvisasaga kuva vikekeke, nokukola tu gulu kugwa mukuudzi.

¹⁶Na u la vi sesa, nembuudza i la vi lulukidza, na kihudzudzi ki la vi salannya; na u la sangala mu Yahova, na u lidzomi nya mu uyu Mutakatifu wa Israeli.

¹⁷Avadaka navadambi venyanga madzi, na fii ga veye ho, na tsinimi tsyavo tsyumanga kigira buluhu; Inze, Yahova, nda va tivulira, inze Nyasaye wa Israeli, si nda va leka mba.

¹⁸Inze nda kunula migera gyamadzi hosi hadiguluku ha veye halavu, na visenukiru hagati ha mavona; kyangalangwi nda ki kola lidavalia lyamadzi, nekivala kyumu nda ki kola visenukiru vyamadzi.

¹⁹Nda simika halala mu kyanga langwi, mutaragwa na kikuma, na musala mulahi, na mbono; na nda simika mu kyangalangwi cypres na musala gwobusuvu, na musala gwa bakisi:

²⁰va duke kulola, noku manya, nokuganagana nokwidzulitsa halala, mukono gwa Yahova gwa lomba inkuva yiyi, na Mutakatifu wa Israeli ya gi lomba.

²¹Mu sunde likuva lyenyu ahi mbi, Yahova a vola, mulete kivune kyenyu kyetsingulu, Mwami wa Yakobo a vola.

²²Va ki twulidze, va kwilwadzire aga lidza: mwilwadze vindu vyokutanga, ni vindu ki, ku duke kuviganagana, nokumanya ki heri kyavyo, kinga mu ku lolekidzire vindu vi li duka lwenyima.

²³Mwi lwadze vindu vi li va lwenyima, ku duke kumanya mu veye avanyasaye: yee, mu kole bulahi, kinga mu kole budamano, ku duke kugenya, noku lola kwosi halala.

²⁴Henza, mu veye vya vutswa; nemiyinzi gyenyu ni gya vutswa; u tovolanga mwinye a veye livihiriridza.

²⁵Nda vukidza mulala kutwula ha kasikasini, naye u duki; kutwula butuliru bweliuva u duki mulala waniranga lieta lyange: na a la duka ku avameha kuli ku kifongo igulu, kandi kuli umulongi a duvulanga ubudohi.

²⁶Ni bwaha yilwadza likuva yili kutwula mu litanga, ku li manye? Noku matsyambiri, ku duke kuvola, A veye wobulungi? Yee, si ha veye nomulala wilwadzanga, yee, si ha veye nomulala u lolekidzanga, yee, si ha veye nomulala u huliranga ma kuva genyu.

²⁷Inze mbeye woku tanga kuvolera Zioni, Henza, henza yavo; na nda haana ku Yerusalemi mulala u letanga makuva malahi.

²⁸Na lwa mbenza, ndola, si ha veye nomundu kali mulala; kali hagati havo si ha veye ho mvoli mulala, kuduka, lwa mba teva, u nyala kutivula kindu.

²⁹Henza yavo vosi, miyi nzi gyavo gyi veye mwika vutswa, na gyavutswa; vifwananyi vyavo vyokwelonga vi veye imbuudza neligenya.