Read lulogooli Isaya 45 Bible Online

Isaya 45 - lulogooli bible

Isaya 45

¹Yahova a volera Kurusi, mbake wewe wa nda gumira mukono gwigwe muiungi, kuguuta tsihiri imbiri wewe, nda boholola vikenge vyavami; kuduka kwigula miliango imbiri wewe, na viribwa vi la vula kuhanwa:

²Ndimira imbiri wowo, na nda leng'annya magiki; na nda vunannya miliango vyomugasa, nokukalaga miluguyu gyekivya;

³nda ha ive ubutugi bwekisundi, nemiyandu gya viswa hamwamu, u duke kumanya inze mbeye Yahova, u ku langanga lieta lilyo, mbeye Nyasaye wa Israeli.

⁴Kigira Yakobo mutumekiri wange, kandi kigira Israeli mutovole wange, nku langi ku lieta lilyo: nku guliki lieta lilyo, kali ive u kikiri kumanya inze.

⁵Inze mbeye Yahova, si ha veye nowundi; si ha veye na Nyasaye wundi bugira inze. Nda boha kikenge kikyo, kali na u vuli kumanya inze;

⁶va duke kumanya kutwula ku litwula lyeliuva, nokutwula madioli, si ha veye nowundi na a ta li inze; inze mbeye Yahova, si ha veye nowundi.

⁷Inze nomba ubulavu, nokukola kisundi; nda leta mirembe, na nda lomba bubi inze mbeye Yahova, wa kola vindu yivi vyosi.

⁸Mu tonyatonya mwinye ligulu kutwula igulu, namalesi ga tsuke ubulungi hasi: kivala kyalame ki duke kuleta ubuhonnyi, na ki mere ubulungi halala; inze, Yahova, nda ki lomba.

⁹Ubudamano bu ve ku uyu u hing'ana no Mulombi wewe kijonjo mu vijonjo vyelirova Ubudohi bu la volera uyu u bu longa, U kola ki ive? Kinga miyinzi gyigyo kuvola, Si a veye na makono?

¹⁰Ubudamano bu ve ku uyu u voleranga dada wewe, Ive wivula kindu ki? Kinga ku volera mukali, U veye nelilumwa lya ki?

¹¹Yahova, Mutakatifu wa Israeli, na Mulombi wewe, a vola ndi: U nteve ku vindu vidzanga; ku vindu vyavana vange, noku miyinzi gyamakono gange, mu ndage.

¹²Nda lomba lirova, nokulomba mundu kulyo: inze, yee, makono gange gaali ligulu; namahe galyo gosi ndagi.

¹³Mmu singeridzi mbulungi, na nda lungekidza tsinzira tsitsye tsyosi: a lombaka lidala lyange, na a la boholola avandu vange vadikidzwa, si ga veye ku litungwa kinga lihebwa madanyi, Yahova wa mahe a vola.

¹⁴Yahova a vola yaga, Linyankana lyemiyinzi gya Egepeti, nevindu vyamaguli vya Ethiopia, na Vasabea, avandu va veye avatambi, va ladza ku ive, va la va avandu vovo: va la londa ive; va ladza ku ive neminyororo gyavo: va la gwa hasi imbiri wowo, va la ku saala, ni va vola, Ligali Nyasaye a veye hagati hoho; si ha veye nowundi, si ha veve na Nyasaye wundi.

¹⁵Ligali ive u veye Nyasaye wivisanga mwene, O Nyasaye wa Israeli, Muhonyi.

¹⁶Va la va isoni, yee, va la genya vosi; yavo ava lombanga vifwananvi va lingira mu leganywa halala.

¹⁷Narutswa Yahova a la honnya Israeli nelihonywa lyemihiga nemihiga: na si mu la va isoni, kinga kugenya kuduka mihiga nemihiga.

¹⁸Kigira Yahova wa lomba ligulu Nyasaye, wa longa lirova nokulikola wa li dinyeridza, ya li lomba li vule kuva lyere, ya li longa avandu va menye ku: uyu a vola ndi, Inze mbeye Yahova; si ha veye nowundi.

¹⁹Inze si mbolanga makiriri, ha kivala kyekisundi; si nda volera kisukululwi kya Yakobo, Mwenya inze vutswa: inze, Yahova, mbola bulungi, nzilwadzanga vindu vyobulungi.

²⁰Mu vunge halala mudze; mwisunde himbi halala, mwinye avahona avetsihiri: si va veye nelimanya ava ginga musala gwekifwananyi kyavo kya vadzwa, na ava saalanga munyasaye u ta nyala kuhonnya.

²¹Mwilwadze, mu lete makuva, yee va kole makuva halala; ni bwaha wa vuula likuva yili kutwula ku matsya mbiri? Ni bwaha yilwadza likuva yili kale? Si a veye inze, Yahova wa kola? Kandi si ha veye na Nyasaye wundi na a ta li inze, Nyasaye wobulungi, no Muhonnyi; si ha veye nowundi.

²²Mu henze ku inze, mu honnywe, mwinye avetsindulu tsyelirova tsyosikigira mbeye Nyasaye, si ha veye nowundi.

²³Inze nzisuhi, inze mwene, likuva li mali kutwula mu munwa gwange mu bulungi, na li la vula kwirana, masigamo gosi ga la sigamwa imbiri wange, tsinimi tsyosi tsi lisuha.

²⁴Mulala a vola ku inze, mu Yahova yeng'ine, vi nyoleka ubulungi nobunyali; avandu va la tsia kuye; navo vosi ava mu dunyira va la va isoni.

²⁵Mu Yahova visukululwi vyosi vya Israeli va la hebwa ubulungi, na va la mkuminya.