Read lulogooli Isaya 48 Bible Online

Isaya 48 - lulogooli bible

Isaya 48

¹Mu hulire yaga, avenyumba ya Yakobo, ava langangwa ku lieta lya Israeli, nokutwula mu madzi ga Yuda; mwinye avesuha ku lieta lya Yahova, nokutala lieta lya Nyasaye wa Israeli navutswa si ga veye mu geligali, kinga mu bulungi

²(kigira velanga avene va veye avandu velidala litakatifu, nokwidira ku Nyasaye wa Israeli; welieta lilye li langwa Yahova wa mahe):

³Inze nzilwadzi vindu vyoku matsyambiri kutwula kale; yee, ga twula mmunwa gwange, na nda ga lang'aminya: nda ga kola nonoho, na ga lombeka.

⁴Kigira nda manya u veye mutingu, ne ligoti li veye lyekivya, nobweni bubwo bu veye mugasa;

⁵kigira yaga nda kwilwadzira inkuva yiyi kutwula kale, nda ku vuulira ni i kikiri kuduka: gase u la vola, Kifwananyi kyange kya lomba yaga, na kifwananyi kyange kya vadzwa, na kifwananyi kyange kyokwelonga, kya laga yaga.

⁶Ive u huliye likuva yili: henza vindu yivi vyosi; na mwinye, si mu la li lang'aminya? Inze nku vuuliye vindu vihya kutwula inyinga ya kalunu, kali vindu vya viswa, vya ive wa vula kumanya.

⁷Vi lombeywi kalunu, si vya lombwa kutwula kale; na ive imbiri welidiku lya lero si wa vi hulira mba; gase u la vola, Henza, nda vi manya.

⁸Yee, si wa hulira; yee, si wa manya; yee, ugutu gugwo si gwigulika kutwula kale: kigira inze nda manya u veye wokukola ubugadi bunene, na walangwa muhyoli kutwula mu livulwa lilyo.

⁹Nda lindageridza ubutima bwange kigira inze mwene, kandi ndegalira ku ive kigira lidzominywa lyange, mbule kukudividza.

¹⁰Henza, mmali kukusiyira mmuliru, navutswa si ga veye kuli ifetha isiyangwa; nku tovoye mu kisambiru kye kivi.

¹¹Kigira inze mwene, yee, kigira inze mwene, nda kola yaga; kigira lieta lyange li lononywa kuli ndi? Nobukumi bwange si nda ha wundi.

¹²Hulira inze, O Yakobo, na Israeli mulangwa wange: inze niye; inze mbeye wokutanga, kandi mbeye wekiheri.

¹³Yee, mukono gwange gu temi umuse gwelirova, kandi mukono gwange mulungi gu vagaye mwigulu: lwa mbi langa, vi singira halala.

¹⁴Mu vugane halala, mwinye mwosi, mu hulire; ni bwaha hagati henyu wilwadza vindu yivi? Uyu wa Yahova a yanza uyu a la kola ubulaliri bwibwe ku Babuloni, na mukono gwigwe gu la va ku Vakalidei.

¹⁵Inze, yee, inze mwene, mmali kuvola; yee, mmali kumuanga; mmali kumuleta, naye a la gaiidza inzira yeye.

¹⁶Mwisunde himbi ku inze, mu hulire likuva yili; kutwula mu litanga si nda vola mu liviswa; kutwula inyinga ya li ho, inze nda li ho: na kalunu Yahova Nyasaye u ntumi, na Roho wewe.

¹⁷Yahova, Mutungiri wowo, Mutakatifu wa Israeli, a vola ndi: Inze mbeye Yahova Nyasaye wowo, u kwegidzanga kunyola vyambeti, ukwimiriranga mu inzira i ku dukiranga kugenda kuyo.

¹⁸Nkano wa ka hulira amalago gange hene yaho mirembe gyigyo nkano gya ka va kuli mugera, nobulungi bubwo kuli viguvuli vyenyanza:

¹⁹lwivulu lulwo nkano lwa ka va kuli muyeke, na vivulwa vyomunda mumwo nkano va ka va kuli tsinzalo tsyomuyeke: lieta lilye nkano si lya twulidzwa imbiri wange.

²⁰Mu twule Babuloni, mwiruke mu twule ku Vakalidei; mwilwadze nomwoyo gwokwimba, mu landidze makuva yaga, mu ga vole kuduka kiheri kyelirova; mu vole, Yahova u tungiye mutumekiri wewe Yakobo

²¹Si va lola buluhu lwa ya vimirira mu kyangalangwi; ya va twulidzira amadzi mu lwanda; yatannya lwanda, na amadzi ga bivuka.

²²Yahova a vola, Si ha veye nemirembe ku vadamano.