Read lulogooli Isaya 49 Bible Online

Isaya 49 - lulogooli bible

Isaya 49

¹Mu hulire inze, mwinye visulu na mwinye avandu, mu tegidze amatu mu hulire, mwinye ava veye ihale: Yahova u nangi kutwula munda; kutwula munda mwa mama wange u tali lieta lyange:

²na ya kola munwa gwange kuva kuli kivavi kyogi; ya mbisa mu kiriri kyomukono gwigwe, u nkoli kuva kivu kya siywa; u mbisi ligali mu imodia yeye:

³na ya mbolera, Ive u veye mutumekiri wange; Israeli, nda kuminyirwa ku ive.

⁴Navutswa inze nda vola, Nda nyankana vutswa ku miyinzi, nda tumekira tsingulu tsyange vutswa, bugira kukonya kindu; halala na yaga likalagirwa lyange li veye ku Yahova, litungwa lyange li veye ku Nyasaye wange.

⁵Na kalunu Yahova wa nomba mmunda nduke kuva mutumekiri wewe, kuleta Yakobo yirane kuye kandi, na kandi Israeli a vungidzwe kuye (kigira mbeye nelidzominywa imbiri wetsimoni tsya Yahova, na Nyasaye wange u gwiye tsingulu tsyange);

⁶yee, a vola, I veye inkuva inyangu ku ive u duke kuva mutumekiri wange kuvukidza tsihiri tsya Yakobo, nokwirannya avalindwa va Israeli: nda haana ive u ve ubulavu bwetsihiri, u duke kuva ubuhonnyi bwange kuduka ku tsindulu tsyelirova.

⁷Yahova, Mutungiri wa Israeli, na Mutakatifu wa Israeli, u volera uyu wavandu va lega, uyu wa vetsihiri va dunyira, uyu mutumekiri wa yavo avamehanga; Avami va la lola nokuvuka; avanene va la sigamira; kigira Yahova u veye musuuvirifu, Mutakatifu wa Israeli, u tovoye ive.

⁸Yahova a vola ndi, Inze mmali kukutivulira inyinga yobugirirwa, nomu lidiku lyobuhonnyi nku honnyikandi nda ku linda, nda twulidza ive u ve lilagana lyavandu, u duke kudinyeridza kivala yiki, nokuvaha miyandu gya lekwa vutswa;

⁹kuvolera avahambe, Hambi kyova; kuvolera ava veye mkisundi, Mwelangaminve. Va laya ku tsinzira, nobwayiru bwavo bu la va hadiguluku hosi ha veye.

¹⁰Si va la lola inzala kandi si va la va nobuluhu; kandi uluya kinga liuva si i la va samba: kigira uyu wa va vemrera a la vimirira, na a la va hila himbi visenukiru vyamadzi.

¹¹Nda kola vigulu vyange vyosi kuva inzira, na mahasi gange ga la kuminywa.

¹²Henza, yava va la twula ihale, na yava va la twula ku tsimbega tsya kasikasini, noku tsimbega tsya madioli; na yava kutwula mu kivala kya Sinim.

¹³Mwimbe, mwinye ligulu; u sangale, ive lirova; mu leterere tsinyimbu, mwinye vigulu: kigira Yahova u mali kuleminya avandu veve mwoyo, na a la vererera avandu veve ava dambidzwa.

¹⁴Navutswa Zioni lya vola, Yahova u mali kusyuva inze, na Mwami u nziviriye.

¹⁵Umukali a nyala kwivirira mwana wewe a nunanga, a luhe a vule kuvererera mwana womunda mwimwe? Yee namusia yava va livirira, navutswa inze si ndivirira ive mba.

¹⁶Henza, nda ku ng'oda mu vigalo vyange; madigi gogo ga veye imbiri wange kazozo.

¹⁷Avana vovo va kolanga bwangu; yavo avononnyanga ive na yavo ava kolanga ive hatswa va la twula ku ive.

¹⁸Ginga tsimoni tsitsyo, u henza tsimbega tsyosi: yavo vosi avevungidza halala vadzanga ku ive. Kuli inze mbeye mwoyo, Yahova a vola, ligali ive u livika yava vosi kuli kwivika kiju kyobukumi, nokweboha yava, kuli mwiha.

¹⁹Kigira makuva ga hango hoho ha veye here, ha ta veye navandu, nekivala kikyo kyononywa, ligali ive kalunu u la va kinyerere ligali, u ta dukira ava menyanga mu, na yavo ava ku mira va la va ihale ku ive.

²⁰Avana velikudzirwa lilyo va la vola kandi mmatu gogo, Hano ha veye hanyerere ligali si ha duki inze mba: u mbe ubwiyangu nduke kumenya.

²¹Hene yaho u la vola mmwoyo gugwo, Ni bwaha u nzivuliye avana yava, navana vange va kudza, na inze ntigala tsyeng'ine, mbeye mwadikidzwi nokuvoyavoya yiyi na yiyi? Kandi ni bwaha wa lera yava? Henza, nda lekwa tsyeng'ine; yava, va li haliha?

²²Yahova Nyasaye, a vola ndi, Henza, nda gingira avandu ve tsihiri mukono gwange, nokusingeridzira avandu ibendera yange; na va la leta avana vayai vovo mu viritu vyavo, navakana vovo va la gingirwa ku mavega gavo.

²³Avami va la va avadada vovo avaleri, na avakaye vovo va la va avamama vovo avaleri: na va linamira imbiri wowo nokuhenzidza tsimoni tsyavo hasi, nokumena lugukyi lwevirenge vivyo; na ive u la manya inze mbeye Yahova, na yavo ava lindiriranga inze va la vula kuva isoni.

²⁴Hene muluviriri a la nyagwa vilanye vivye, naho ava hambwa buhambe bweligali va la bohololwa?

²⁵Navutswa Yahova a vola, Kali avahambe vomuluviriri va la twulidzwa, nevilanye vya yavo ava tihidzanga vi la honywa; kigira inze nda hing'ana na uyu u hing'ana nive, na nda honnya avana vovo.

²⁶Na ava dambidzanga ive nda va lihidza inyama yavo avene; na va la hambika kulinwa lyamasahi gavo avene, kuli iwaini inulu: na avemibiri vosi va la manya inze, Yahova, mbeye Mukonyi wowo, Mutungiri wowo, Wanyala Vyosi wa Yakobo.